News Portal

ताजा शिर्षकहरु

चर्चित शिर्षकहरु

कला/साहित्य

झझल्को

साँझको समयमा
सफा, निलो र खुला नभ मुनि
चिसो पवनको स्पर्शले रोमाञ्चित छन्
उनीहरु अर्थात्
प्रियतम र प्रेयसी ।

अस्ताउन लागेको
पहेंलो घामले छरेको
सुनौलो किरणले
चम्किएको हिमाल देखेर
पुलकित छन् उनीहरु ।

पानीमा पौडी खेलिरहेको
त्यो सुनौलो हिमालको प्रतिबिम्ब र
किनारका हरिया दृश्य देख्दा
हर्षले रौं ठाडा भएका छन् उनीहरुका ।

कहिले प्रियसी हातमा
कहिले प्रियसीको केशमा
सलबलाई रहेका छन्
प्रियतमका औंलाहरु ।

अलौकिक दृश्य हेरेर
प्रफुल्ल छन् दुई जोडी नयनहरु,
प्रफूलित नयनहरु जुध्दा
मुस्कुराउँछन् अधरहरु ।

छिप्पिदो साँझ सँगै
पारि मन्दिरमा बज्न थालेका छन्
सन्ध्याका घण्टीहरु
प्रोज्ज्वलित हुदै छन्
वारि बाराही घाटमा
आरतीका दियाहरु ।

प्रकृति र संस्कृतिको
सौन्दर्यमा रमाएकाका मनहरुलाई
अध्यात्मले पनि छुँदो रहेछ
कुनैबेला
त्यसैले त झुक्छ शिर उतै फर्केर
जताबाट आएका छन् घण्ट ध्वनिहरु र
ज्योतिको प्रकाशहरु ।

अब
छिप्पिएको साँझ छ,
आरतिको सुन्दरता छ,
घण्टीको मधुरता छ,
छन् अनि अघि देखि
प्रकृतिको सुन्दरता र
प्रेमी प्रेमिकाको प्रेमालाप
अवलोकन
गरिरहेका एक जोडि अधवैंशे दम्पती ।

जसलाई
आउँछ झझल्को
ति दिनहरुको,
आफ्नै प्रेमको,
लुकाएर पढेका रोमाञ्चित
उपन्यासहरुको र
हेर्छन एक आपसमा
मुसुक्क मुस्कुराएर
गाला राता बनाएर
विगत सम्झँदै ।

#ढाकामोहन बराल
पोखरा-७, मासबार, कास्की
फोन नं ९८४६०३९९८८

प्रतिक्रिया

डनन्यूज ट्रेन्डिङ