पोखरा, २३ भदौ । कास्कीको अन्नपूर्ण गाउँपालिका-११ स्थित किम्रुङ खोलामा पहिरो खस्दा खोला थुनिएको छ। यससँगै नदी किनारका बस्तीहरूमा उच्च सतर्कता अपनाइएको छ।

स्थानीय बासिन्दा र जनप्रतिनिधिमार्फत सूचना प्राप्त हुनासाथ जिल्ला प्रहरी कार्यालय कास्कीले नयाँपुल, वीरेठाँटी र आसपासका सम्भावित जोखिमयुक्त क्षेत्रमा माइकिङ गर्दै स्थानीयलाई सुरक्षित स्थानतर्फ जान आग्रह गरेको छ। कास्की प्रहरी प्रमुख एसपी नवीन कार्कीका अनुसार करिब ६ घण्टादेखि खोला थुनिएको र अचानक पानीको बहाव खुल्दा ठूलो बाढी आउन सक्ने खतरालाई मध्यनजर गर्दै सुरक्षा सतर्कता बढाइएको हो।

अन्नपूर्ण गाउँपालिकाका अध्यक्ष विष्णुबहादुर केसीले बिहानैदेखि थुनिएको खोलामा अहिले पानीको बहाव केही घटेको जानकारी दिएका छन्। यद्यपि, केही समययता थुनिएको पानी एकाएक बग्न थाल्दा तल्लो तटीय क्षेत्रमा गम्भीर असर पर्न सक्ने जोखिम कायमै छ।

यसअघि भदौ २ गते मोदी खोलामा आएको बाढीले वीरेठाँटी क्षेत्रमा सडक कटान गर्नुका साथै पुलसमेत बगाएको थियो। उक्त बाढीका कारण घान्द्रुक जाने सडक अझै पनि पूर्ण रूपमा सञ्चालनमा आउन सकेको छैन। किम्रुङ खोलाको पानी अगाडि बढेर मोदी खोलामा मिसिने र मोदी हुँदै कालीगण्डकीसम्म पुग्ने भएकाले नेपाल बाढी सूचना केन्द्रले मंगलबार बेलुकी विशेष सतर्कता अपनाउन सार्वजनिक सूचना जारी गरेको छ।

प्रशासनले नदी तथा खोला किनारका बासिन्दालाई अर्को सूचना नभएसम्म नदी आसपास नजान र पूर्ण सतर्कता अपनाउन अपिल गरेको छ।