पोखरा, २२ चैत । नेपाली लेखक संघ कास्कीको छैटौं अधिवेशनले कमल पौडेल ‘अथक’को अध्यक्षतामा नयाँ कार्यसमिति निर्वाचित गरेको छ ।
नयाँ कार्यसमितिमा उपाध्यक्षमा चन्द्रावती वाग्ले, सचिवमा रोशन तिमिल्सिना, सहसचिवमा वसन्त चालिसे र कोषाध्यक्षमा गायत्री पराजुली निर्वाचित भएका छन् । सदस्यमा भेषराज पौडेल चयन भएका छन् भने बाँकी सदस्य तथा सल्लाहकारहरू आगामी कार्यसमिति बैठकबाट चयन गरिने अध्यक्ष कमल पौडेल अथकले बताएका छन् ।

संघका सल्लाहकार लक्ष्मी थापाको संयोजकत्वमा हीममाया पौडेल र अमृत क्षेत्री सदस्य रहेको निर्वाचन समितिले उक्त कार्यसमिति निर्वाचित गरेको हो । निर्वाचनपछि नवनिर्वाचित पदाधिकारीहरूलाई निर्वाचन समितिका संयोजक लक्ष्मण थापा, सदस्य हीममाया पौडेल र अमृत क्षेत्री तथा सल्लाहकार डा. लक्ष्मीशरण अधिकारीले अविर, खादा र प्रमाणपत्र प्रदान गरे । यसअघिको कार्यसमितिले भने नयाँ समितिलाई माइन्युट हस्तान्तरण गरेको थियो ।

अधिवेशनको उद्घाटन सत्रमा संघका सल्लाहकार प्रा. डा. लक्ष्मीशरण अधिकारीले लेखकीय स्वतन्त्रता र लोकतन्त्रवादी लेखक–साहित्यकारहरूको जमघट हुने थलोका रूपमा लेखक संघ रहेको बताए । देशको कठिन समयमा लेखक–साहित्यकारहरूको सिर्जनाले विशेष महत्व राख्ने उनको धारणा थियो ।

कार्यक्रममा संघकी अध्यक्ष रीता अधिकारीको अध्यक्षतामा केन्द्रीय उपाध्यक्ष इश्वरमणि अधिकारी, प्रदेश अध्यक्ष दीपक समीप, उपाध्यक्ष कमल पौडेल अथक र सचिव सञ्जय न्यौपाने ‘प्राञ्जल’ले समेत बोलेका थिए ।

नयाँ कार्यसमितिले नेपाली साहित्यको विकास र लेखकहरूको हकहितका लागि थप सक्रिय भूमिका खेल्ने अपेक्षा गरिएको छ ।