पोखरा, १२ कार्तिक । गीतकार प्रतिष्ठान, नेपालले यस वर्षको गीतकार सम्मान-२०८२ पत्रकार तथा गीतकार आरजु विष्ट ‘सल्यानी’लाई प्रदान गर्ने भएको छ। प्रतिष्ठानको तेस्रो अधिवेशन तथा पाँचौँ साधारण सभाको अवसरमा आगामी कार्तिक १५ गते शनिबार पोखरामा आयोजित विशेष समारोहमा उनलाई नगद ५ हजार ५५५ रुपियाँ, दोसल्ला र सम्मानपत्रसहित यो सम्मान हस्तान्तरण गरिनेछ।

प्रतिष्ठानका संस्थापक अध्यक्ष हरिहर खनियाको संयोजकत्वमा गठित प्रतिभा छनोट समितिमा गीतकार सरस्वती श्रेष्ठ ‘सरू’ र सुरज उपाध्याय सदस्य तथा अध्यक्ष शीतल गिरी र सचिव रुपिन्द्र प्रभावी पदेन सदस्य रहेका थिए। समितिको सिफारिसलाई प्रतिष्ठानको कार्यसमितिले अनुमोदन गरेको उपाध्यक्ष अनुराग अधिकारीले जानकारी दिए।

सल्यानको खलङ्गामा जन्मिएका विष्ट २०५८ सालदेखि पोखरामा बसोबास गर्दै पत्रकारिता र साहित्य सृजनामा सक्रिय छन्। उनी रेडियो अन्नपूर्णमा समाचार प्रमुखका रूपमा कार्यरत छन्। ‘सागर’ र ‘झ्याम्म झ्याम्म’ गरी दुई गीति एल्बम बजारमा ल्याइसकेका विष्टका ‘जित मात्रै कहाँ हो र…’, ‘झ्याम्म झ्याम्म…’, ‘ठोकिँदा ठोकाइमा…’, ‘लौ आयो भलिबल’, ‘आहा रारा गोल्डकपमा…’ जस्ता गीतहरू निकै लोकप्रिय छन्। हालसम्म उनका करिब ३०० गीत रेकर्ड भइसकेका छन्।

यसअघि उनी गजेन्द्र भण्डारी स्मृति पत्रकारिता पुरस्कार, विन्दवासिनी राष्ट्रिय सङ्गीत पत्रकारिता पुरस्कार र राप्ती राष्ट्रिय म्युजिक पुरस्कारलगायतबाट सम्मानित भइसकेका छन्।

गीत लेखन क्षेत्रमा उल्लेखनीय योगदान दिएका नेपाली गीतकारलाई हरेक दुई वर्षमा प्रदान गरिने यो सम्मान यसअघि प्रकट पगेनी ‘शिव’, शीतल कादम्बिनी र सरस्वती श्रेष्ठ ‘सरू’ले प्राप्त गरिसकेका छन्।