पोखरा, ३० भदौं । समाचार सम्प्रेषणको विषयलाई लिएर मुस्ताङका क्रियाशील पत्रकार सुन्दरकुमार थकालीमाथि ज्यान मार्ने धम्की आएको घटनाप्रति प्रेस जगत् गम्भीर बनेको छ । ‘छेतेन गुरुङ’ नामक ह्वाट्सएप प्रयोगकर्तामार्फत पत्रकार थकालीलाई गालीगलौज गर्नुका साथै ज्यान मार्ने धम्की दिइएको हो । पछिल्लो समय उनले नेपाल-चीन सीमानास्थित कोरोला नाकामा कन्टेनर सन्दर्भलाई समेटेर समाचार प्रकाशन गरेका थिए । सोही समाचारलाई जोडेर आफूलाई धम्की आएको पत्रकार थकालीले जानकारी दिएका छन् ।

घटनालगत्तै नेपाल पत्रकार महासंघ मुस्ताङ शाखाले यस विषयलाई गम्भीर रूपमा लिँदै दोषीमाथि कडा कारबाही र पत्रकारको सुरक्षाको माग गर्दै जिल्ला प्रहरी कार्यालय, मुस्ताङमा औपचारिक निवेदन दर्ता गराएको छ । महासंघका शाखा अध्यक्ष सुनदेवी रसाइली र सचिव आदित्य रसाइलीद्वारा संयुक्तरुपमा सोमबार डीएसपी रामचन्द्र तिवारीसमक्ष सो निवेदन पेस गरिएको हो । उक्त निवेदनको बोधार्थ जिल्ला प्रशासन कार्यालय मुस्ताङ, नेपाल पत्रकार महासंघ केन्द्रीय समिति तथा गण्डकी प्रदेश समितिमा समेत पठाइएको छ ।

पत्रकार महासंघले भौगोलिक रूपमा सुदूर र हिमाली क्षेत्रको असहज परिस्थितिमा रहेर स्वतन्त्र पत्रकारिता अभ्यास गरिरहेका श्रमजीवी पत्रकारको भौतिक सुरक्षा र प्रेस स्वतन्त्रताको ग्यारेन्टी गर्न राज्यका निकायहरूसँग जोडदार माग गरेको छ । महासंघले घटनाको निष्पक्ष छानबिन गरी डिजिटल माध्यमबाट हुने यस प्रकारका आपराधिक गतिविधि नियन्त्रण गर्न र दोषीलाई कानुनी दायरामा ल्याउन आग्रह गरेको छ ।

यसैबीच, पत्रकार थकालीले पनि सुरक्षाको माग गर्दै सोमबार नै जिल्ला प्रहरी कार्यालयमार्फत नेपाल प्रहरीको केन्द्रीय साइबर ब्युरोमा समेत छुट्टै उजुरी दर्ता गराएका छन् । राष्ट्रिय समाचार समिति (रासस)का मुस्ताङ संवाददाता तथा ‘इमुस्ताङन्युज’ अनलाइन पोर्टलका सञ्चालक थकाली नेपाल पत्रकार महासंघ गण्डकी प्रदेश कार्यसमिति सदस्य तथा मुस्ताङ शाखाका निवर्तमान अध्यक्ष हुन् ।

हिमालपारिको जिल्ला मुस्ताङमा विगत १२ वर्षदेखि निरन्तर र व्यावसायिक पत्रकारितामा सक्रिय थकालीमाथि भएको यस प्रकारको धम्कीले प्रेस स्वतन्त्रता र अभिव्यक्ति स्वतन्त्रतामाथि गम्भीर लागेको भन्दै विभिन्न संघ–संस्थाहरूले समेत भत्र्सना गरेका छन् ।