पोखरा, ११ भदौं । पोखरा महानगरपालिका–३२ स्थित गोगन माध्यमिक विद्यालयको शैक्षिक विकासमा महत्वपूर्ण योगदान पुर्‍याउँदै आएका शिक्षासेवी स्व. भक्तबहादुर बस्नेतको परिवारले २३ लाख ५२ हजार चार सय रुपैयाँ विद्यालयलाई हस्तान्तरण गरेको छ।

विद्यालयमा आयोजित एक विशेष समारोहका बीच स्व. बस्नेतकी धर्मपत्नी चिनुमाया बस्नेत र परिवारका अन्य सदस्यहरूले संयुक्त रूपमा उक्त रकम बराबरको चेक विद्यालयका प्रधानाध्यापक किरणबाबु न्यौपानेलाई हस्तान्तरण गर्नुभएको हो।

वि.सं. २०६६ सालमा सञ्चालन भएको महायज्ञको अवसरमा स्व. बस्नेतले कुल २५ लाख ५५ हजार पाँच सय ५५ रुपैयाँ सहयोग गर्ने घोषणा गर्नुभएको थियो। सोही बोलकबोल रकममध्ये हाल बाँकी रहेको रकम परिवारजनले पूर्णता दिँदै विद्यालयलाई प्रदान गरेका हुन्।

वडा नं ३२ का वडाअध्यक्ष अक्कलबहादुर कार्कीको प्रमुख आतिथ्यता तथा प्रधानाध्यापक किरणबाबु न्यौपानेको अध्यक्षतामा सम्पन्न कार्यक्रममा बोल्दै परिवारका तर्फबाट कृष्ण बस्नेतले आफ्नो परिवार सदैव विद्यालयको मुहार फेर्न र शैक्षिक उन्नयनमा सहकार्य गर्न तत्पर रहेको स्पष्ट पारे । सोही अवसरमा परिवारजनले विद्यालय परिसरभित्र स्व. भक्तबहादुर बस्नेतको अर्धकदको सालिक स्थापना गर्ने घोषणा समेत गरेका छन्।

कार्यक्रममा वक्ताहरूले २०२५ सालदेखि नै विद्यालयको स्थापना, सञ्चालन तथा व्यवस्थापनमा स्व. बस्नेतले पुर्‍याएको अतुलनीय योगदानको स्मरण गरेका थिए। उहाँले लामो समयसम्म विद्यालय व्यवस्थापन समितिको अध्यक्षका रूपमा नेतृत्व सम्हाल्दै विद्यालयलाई वर्तमान अवस्थासम्म पुर्‍याउन महत्त्वपूर्ण भूमिका खेलेका थिए ।

सहायक प्रधानाध्यापक चन्द्रमाया थापाले सञ्चालन गरेको उक्त कार्यक्रममा पूर्व प्रधानाध्यापक डम्बरप्रसाद पौडेलले स्वागत मन्तव्य व्यक्त गरेका थिए । कार्यक्रममा विभिन्न राजनीतिक दलका प्रतिनिधि, शिक्षासेवी, विद्यालय व्यवस्थापन समितिका पूर्वअध्यक्षहरू तथा स्थानीय बुद्धिजिवीहरूको बाक्लो उपस्थिति रहेको थियो।