पोखरा, २१ भदौ । यस वर्षको प्रतिष्ठित ‘सहारा खेलकुद पत्रकारिता पुरस्कार-२०८३’ पत्रकार रोहितराज पराजुलीलाई प्रदान गरिने भएको छ।

सहारा क्लब पोखराद्वारा सञ्चालित सो पुरस्कार छनोट समितिको सिफारिसअनुसार पराजुलीलाई प्रदान गर्ने निर्णय गरिएको क्लबका अध्यक्ष केशवबहादुर थापाले जानकारी दिएका छन्। क्लबका मानार्थ सदस्य नारायण कार्कीको संयोजकत्वमा गठित प्रतिभा छनोट समितिको सिफारिसका आधारमा यो निर्णय गरिएको हो।

फुटबलमार्फत सामाजिक सेवामा क्रियाशील मोफसलको चर्चित सहारा क्लबले खेलकुद गतिविधिलाई प्राथमिकता दिएर समाचार सम्प्रेषण गर्ने एक जना पत्रकारलाई उनको योगदानको कदर गर्दै बर्सेनि यो पुरस्कार प्रदान गर्दै आएको छ। नेपालमै पहिलोपटक २०६३ सालमा खेलकुद पत्रकारिता विधामा स्थापित यस पुरस्कारबाट यसअघि २० जना खेलकुद पत्रकारहरू सम्मानित भइसकेका छन्।

हाल नयाँ पत्रिका दैनिकमा आबद्ध पोखरा-१ निवासी पराजुलीले २०६१ सालमा आदर्श समाज दैनिकबाट विद्यार्थी पत्रकारिताको रूपमा आफ्नो पत्रकारिता यात्रा सुरु गरेका थिए। यसअघि उनले युवा तथा खेलकुद मन्त्रालयको खेलकुद पत्रकारिता प्रोत्साहन पुरस्कार, खेलकुद पत्रकार मञ्च गण्डकीको उत्कृष्ट खेल पत्रकार अवार्ड र अन्नपूर्ण पर्यटन पत्रकारिता पुरस्कारसमेत प्राप्त गरिसकेका छन्।

यसपालि क्लबले पुरस्कारको राशिमा समेत वृद्धि गरेको छ। ३० हजार ५ सय २५ रुपैयाँ नगद र सम्मानपत्रसहितको उक्त पुरस्कार क्लबको आगामी वार्षिकोत्सवको अवसरमा एक समारोहबीच हस्तान्तरण गरिनेछ।