पोखरा, १८ चैत । कृषि वैज्ञानिक तथा साहित्यकार डा. अनिल सुवेदीका तीनवटा नयाँ कृति एकैसाथ सार्वजनिक भएका छन् । उनका ‘उच्छलित मन’ र ‘सेती खोचका सुसेलीहरु’ कविता संग्रह तथा अनुसन्धानात्मक कृति ‘बास्तु र वनस्पति’ लोकार्पण गरिएको हो ।

नेपाल संगीत तथा नाट्य प्रज्ञा–प्रतिष्ठानका पूर्व कुलपति तथा वरिष्ठ साहित्यकार सरुभक्तको प्रमुख आतिथ्यमा आयोजित विशेष समारोहमा उक्त कृतिहरू विमोचन भएका हुन् ।

कार्यक्रममा प्राडा जगन्नाथ रेग्मीले डा. सुवेदीका दुवै कविता संग्रहको समीक्षा प्रस्तुत गर्दै कविताहरूमा व्यक्त भावनात्मक गहिराइ र प्रकृतिप्रतिको संवेदनशीलतालाई उजागर गरेका थिए । यसैगरी, सहप्राध्यापक कल्याण पन्तले अनुसन्धानात्मक कृति ‘बास्तु र वनस्पति’को समीक्षा गर्दै वैज्ञानिक दृष्टिकोणसँगै सांस्कृतिक सन्दर्भलाई जोड दिएका थिए ।

लेखनाथ साहित्य प्रतिष्ठानका अध्यक्ष पद्मराज ढकालको अध्यक्षतामा सम्पन्न उक्त कार्यक्रममा कृतिकार डा. अनिल सुवेदी, बिम्बकवि रमेश श्रेष्ठ र प्रकाशक रामचन्द्र लामिछानेले आ–आफ्नो मन्तव्य राखेका थिए । प्रतिष्ठानका सदस्य ऋषिकेश बरालले स्वागत मन्तव्य राखेको कार्यक्रमको सञ्चालन सचिव कृष्णप्रसाद पौडेलले गरेका थिए ।