काठमाडौं, ११ भदौं । भोटेकोशी र त्रिशूली नदीको तटीय क्षेत्रमा बाढीको उच्च जोखिम कायमै रहेको छ। चीनतर्फ नदी थुनिएर ठूलो ताल बनेको र त्यो निरन्तर बढिरहेको पाइएपछि जल तथा मौसम विज्ञान विभाग अन्तर्गतको बाढी पूर्वानुमान महाशाखाले विशेष सतर्कता अपनाउन आग्रह गरेको छ।

चीनको जलस्रोत मन्त्रालय तथा त्यहाँका सञ्चारमाध्यम ‘ग्लोबल टाइम्स’मा प्रकाशित समाचार अनुसार, ल्हेन्दे खोलामा गएको हिमपहिरोका कारण चीनतर्फको छोचेन खोला र नेपालतर्फको पुरेपु त्याङ्कपो खोलाको दोभानमा नदी थुनिएर कृत्रिम ताल बनेको छ। नेपालको परराष्ट्र मन्त्रालयमार्फत प्राप्त पछिल्लो चिनियाँ सूचना, भू–उपग्रह (सटेलाइट) का तस्बिरहरू तथा प्रारम्भिक विश्लेषणका आधारमा महाशाखाले उक्त तालको जलसतह बढ्ने क्रममा रहेको र यो अचानक फुट्न सक्ने जोखिम औंल्याएको छ।

चिनियाँ रिपोर्टमा उल्लेख भएअनुसार नदीको माथिल्लो क्षेत्रमा बनेको तालमा बिहीबार बिहानसम्म २० लाख घनमिटर पानी जम्मा भइसकेको छ भने आगामी तीन दिनभित्र थप ३० लाख घनमिटर पानी जम्मा हुन सक्ने देखिएको छ। तालबाट पानी बाहिरिन सुरु गरेपछि र सम्भावित बाढीको जोखिमलाई मध्यनजर गर्दै चिनियाँ मन्त्रालयले समेत यसको निरन्तर निगरानी गरिरहेको र बाढीको खतराबारे मोडलिङ विश्लेषण गरिरहेको जनाइएको छ। गत भदौ १० गते गएको बाढी र पहिरोका कारण यसअघि नै चीनतर्फ ३ जनाको मृत्यु भइसकेको छ भने २६० जना विदेशी नागरिकसहित ५५८ जना अझै बेपत्ता रहेका छन्।

माथिल्लो तटीय क्षेत्रमा बनेको उक्त ताल फुट्न सक्ने र त्यसले भोटेकोशी तथा त्रिशूली नदीको तल्लो भागमा ठुलो क्षति पुर्याउन सक्ने खतरा रहेकाले अर्को सूचना नआउँदासम्म नदी किनारका बासिन्दा, यात्रु र उद्धार कार्यमा खटिने सम्पूर्ण सुरक्षाकर्मी तथा नागरिकलाई उच्च सतर्कता अपनाउन महाशाखाले अनुरोध गरेको छ। प्रशासनले नदी किनारका जोखिमयुक्त क्षेत्रहरूमा आवतजावत नगरी सुरक्षित स्थानमा रहन आग्रह गरेको छ।