पोखरा, १३ असार । भवानी आमा समूह कुवँरटोल पोखराले आफ्नो कार्यसमिति तथा उपसमितिका सदस्यहरूलाई तिन दिनको नेतृत्व विकास तथा क्षमता अभिवृद्धि तालिम सम्पन्न गरेको छ ।

तलिमका सहभागीलाई प्रमाणपत्र वितरण गर्दै पोखरा महानगरपालिका वडा नंं. ८ का वडा अध्यक्ष रुद्रनाथ बराले नेतृत्व र क्षमता विकास गरिसकेपछि कानुनी सचेतनाका साथै सीपमूलक तालिम लिएर आमा समूह आयआर्जन र उत्पादनमा लाग्न आग्रह गरे । बरालले भने ‘वडासँग पैसाको कमी छैन्, सीप सिकेर उद्यमशील बन्न हामी सघाउँछौ, श्री भवानी आमा समूहलाई पोखराको नमुना आमा समूह बनाउने आफ्नो लक्ष्य छ ।’

कार्यक्रममा कुवँर समाज समितिका अध्यक्ष शिव कुवँर, प्रथम उपाध्यक्ष राजेश कुवँर, महासचिव शिव कुवँर ‘शम्भु’, कुवँरटोल विकास संस्थाकी अध्यक्ष पारवता पौडैल, आमा समूहकी सल्लाहाकार श्रीमाया कुँवर, कार्यक्रम संयोजक विबा कुवँर, निवर्तमान अध्यक्ष सिता कुवँर, द्वितीय उपाध्यक्ष इन्दिरा गौतमले तालिमबाट जानेका कुरा व्यवहारमा उतारी समूहका सदस्यहरूलाई पनि बोल्न सक्ने बनाउन जरुरी रहेका धारणा व्यक्त गरे ।

तालिममा सहभागी दिपा कुवँर, सिर्जना कुवँर, विन्दु कुवँरले आफ्नो अनुभव राखदै क्षमता विकास तालिमसँगै जीवन उपयोगी व्यावहारिक कुरा, बोल्ने कला र ‘किन संस्कृति’ का बारेमा जानकारी पाउँदा परिआउँदा प्रश्न गर्न सक्ने र बोल्न सक्ने आत्मविश्वास बढेको अनुभव सुनाएका थिए । आमा समूहकी अध्यक्ष समीक्षा कुवँरले आगामी दिनमा वडा कार्यालय, महानगरपालिका तथा विभिन्न संघसंस्थासँग सहकार्य गरेर महिला समूहलाई उद्यमशील तालिम सञ्चालनका लागि आफू प्रतिवद्ध भएर लाग्ने जानकारी दिइन ।

पोखरा महानगरपालिका वडा नं. ८ को आर्थिक सहयोगमा यही असार ८ गतेदेखि १० गतेसम्म सञ्चालित तालिमको सहजीकरण तथा प्रशिक्षण सञ्चारकर्मी सुरेश रानाभाटले गरेका थिए । बाइस वर्षदेखि क्रियाशील आमा समूहमा १ सय १२ आमाहरू सक्रीय छन् । समूहकी अध्यक्ष समीक्षा कुवँरको सभापतित्वमा सम्पन्न समापन समारोहमा प्रथम उपाध्यक्ष मधु कुवँरले स्वागत मन्तव्य राखेकी थिइन भने सचिव सपना सापकोटा कुवँरले कार्यक्रम सञ्चालन गरेकी थिइन् ।