पोखरा, २९ साउन । अविरल वर्षाका कारण मोदीखोलामा आएको बाढीले कास्की र पर्वत जोड्ने दुई मेटल पुल बगाएको छ। अन्नपूर्ण माता मन्दिरमा फसेका तीन जनालाई सशस्त्र प्रहरी बल नेपाल नं. २४ कालिका गण कास्कीको उद्धार टोलीले सकुसल उद्धार गरेको छ।

सशस्त्र प्रहरी बल नेपाल नं. २४ कालिका गणका प्रमुख एसपी बसन्त सिंहका अनुसार राति २ः१५ बजेबाट नै चार जना रोप रेस्क्यु र तीन जना गोताखोरसहितको उद्धार टोली घटनास्थल पुगेर उद्धार कार्य सम्पन्न गरेको हो। उद्धार गरिएका तीन जनामा एक पुजारी र दुई भक्तजन छन्।

अन्नपूर्ण गाउँपालिका-५ र ६ को सिमानामा मोदीखोलाको बीचमा अवस्थित अन्नपूर्ण माता मन्दिरमा आवतजावतका लागि निर्माण गरिएका पर्वत र कास्कीतर्फका दुवै मेटल पुल बाढीले बगाएको छ। बाढीले मन्दिरको आधा भागमा समेत क्षति पुर्‍याएको छ। बाढीका कारण घान्द्रुक जाने सडक विभिन्न चार स्थानमा भत्किएको छ भने बिजुलीका पोल बगेका कारण विद्युत आपूर्ति समेत अवरुद्ध भएको छ। यतिबेला जिल्ला प्रशासन कार्यालय कास्कीका प्रमुख जिल्ला अधिकारी कुमान सिंह गुरुङ, कास्की प्रहरी प्रमुख र कालिका गणका प्रमुख एसपी बसन्त सिंह सहितको टोली घटनास्थलमा पुगिसकेको छ।