पोखरा, १९ भदौं । पोखरा महानगरपालिका वडा नं. १८ गैरीचौतारा घुम्तिस्थित सेदीबाट लेकसाइडतर्फ आउँदै गरेको भारतीय नम्बर प्लेटको कार शुक्रबार बिहान करिब ४ः५० बजे सडकबाट करिब २० मिटर तल फेवातालमा खसेको छ । यस घटनामा कारमा सवार चार जना पुरुषमध्ये दुई जनाको मृत्यु भएको छ भने दुई जना घाइते अवस्थामा उद्धार गरिएको छ ।

घटनाको सूचना प्राप्त हुनासाथ वडा प्रहरी कार्यालय बैदाम र सशस्त्र प्रहरी बल नेपाल नं. २४ हेक्वा कालिका गणबाट खटिएको संयुक्त प्रहरी टोलीले कारबाट चारै जनालाई उद्धार गरी उपचारका लागि पोखरा स्वास्थ्य विज्ञान प्रतिष्ठान पश्चिम क्षेत्रीय अस्पताल पठाएको थियो ।

अस्पतालमा पुगेपछि चिकित्सकले दुई जनालाई मृत घोषणा गरेका छन् भने बाँकी दुई जनाको उपचार जारी रहेको प्रहरीले जनाएको छ ।
मृतकहरुमा भारतको बिहार प्रदेशको रक्सौल घर भएका २६ वर्षीय नवदीप कुमार यादव र करिब २६ वर्षीय प्रियान्सु पाण्डे रहेका छन् । घाइते अवस्थामा उद्धार गरिएकाहरुमा बिहारको मोतिहारी जिल्ला रक्सौल घर बताउने २७ वर्षीय अनमोल कुमार यादव र ३३ वर्षीय सुरज यादव छन् । प्रहरीले घटनास्थलबाट कारलाई क्रेनको सहायताले निकाली थप अनुसन्धान अगाडि बढाएको छ ।