पोखरा, २९ वैशाख । तेन्जेन रोक्का मगर र कविता मगरले पोखरा महानगरपालिका वडा नम्बर १ पुरानो टुँडिखेल स्थित राष्ट्रिय माध्यमिक विद्यालयले आयोजना गरेको पाँच किलो मिटर छात्र/छात्रा सडक दौडको उपाधि हात पारेका छन् ।

स्थापनाको ७५ औ वर्ष प्रवेशको अवसरमा हिरक महोत्सव मनाइरहेको विद्यालयले हीरक महोत्सव अन्तर्गत गठन गरिएको खेलकुद उपसमितिले शनिबार आयोजना गरेको दौडमा छोरेपाटन माविका तेन्जेनले सहभागी अन्य ६ सय १३ जनालाई पछि पार्दै निर्धारित दुरी १६ मिनेट ५७.६३ सेकेण्ड पुरा गदै उपाधि हात पार्दा छात्रातर्फ २२ मिनेट ३२.०१ सेकेण्डमा दौड पुरा गरेकी गौरीशंकर माविकी कविताले सहभागी अन्य दुई सय ५३ जनालाई पछि पार्दै उपाधि हात पार्न सफल भएकी हुन् ।

प्रतियोगिता अन्र्तगत छात्रतर्फ १७ मिनेट १२.६३ सेकेण्डका दुरी पार गरेका छोरेपाटन माविका प्रकाश थिङ दोस्रो र १७ मिनेट ४७.९४ सेकेण्डमा दुरी पुरा गरेका अक्सफोर्ड स्कुलका ईश्वर ढकाल तेस्रो भए ।

छात्रातर्फ २२ मिनेट ३५.०९ सेकेण्डमा दुरी पार गदै मेघराज आधारभूत माविकी एञ्जिला जिटी दोस्रो र २२ मिनेट ४६.०५ सेकेण्डमा दौड पुरा गरेकी छोरेपाटन माविकी साधना सेवा तेस्रो भईन । छात्र/छात्रा प्रथम, दोस्रो र तेस्रो हुनेहरुले क्रमश: सात, पाँच र तीन हजार नगदसँगैं पदक र प्रमाण पत्र पुरस्कार पाए ।

विभिन्न ४४ विद्यालयका ६ सय १४ छात्र र दुई सय ५४ छात्रा गरी कुल आठ सय ६८ जनाले सहभागिता जनाएका थिए । विजेता खेलाडीहरुलाई गण्डकी प्रदेश सभाका सदस्य गणेशमान गुरुङ, पोखरा महानगरपालिका वडा नं १ का अध्यक्ष साहारा प्रधान, विद्यालयका अध्यक्ष रामविक्रम राणा, प्रधानाध्यापक ईश्वरी सापकोटा लगायतले पुरस्कार वितरण गरेका थिए ।

विद्यालयको गेटबाट सुरु भएको दौड हरिचोक–विन्ध्यवासिनी मन्दिर–बागलुङ बसपार्क–भिमसेन मन्दिर चोक–कोपिलढुङ्गा चोक–ज्ञानभूमि स्कूल चोक–बाल मन्दिर स्कुल चोक–पि.एन. क्याम्पस चोक–भीमकालीपाटन चोक–वडा कार्यालय पोखरा-१–लामपाटन मार्ग–सिमपानी चोक–हरिचोक हुँदैं टुँडिखेलमा आएर सम्पन्न भएको थियो । खेलकुद अन्तर्गत दौड पछि विद्यालयले परम्परागत छेलो (ठेलो) प्रतियोगिता (छात्र/छात्रा) सँगैं जिल्ला स्तरीय भलिबल प्रतियोगिता (छात्र/छात्रा) समेत आयोजना गर्ने तयारी गरेको छ ।