मनाङ, १५ असोज । मनाङको निस्याङ गाउँपालिकामा खराब मौसम र पहिरोका कारण केही दिनदेखि अलपत्र परेका १६ जना इन्डोनेसियाली पर्यटकको सुरक्षित उद्धार गरिएको छ।

अन्नपूर्ण पदमार्गमा ट्रेकिङका लागि गएका ती पर्यटकहरू असोज ८ देखि ११ गतेसम्म परेको निरन्तरको वर्षापछि गएको पहिरोका कारण मनाङको घताङ एग्रो क्षेत्रमा फसेका थिए। पदमार्ग र बेँसीसहर-चामे सडकखण्डमा आवतजावत अवरुद्ध भएपछि उनीहरू अलपत्र परेका थिए।

प्रहरीका अनुसार उद्धार गरिएका पर्यटकमा सिटी आलिया रहादियानी, अराफी अनुगेराह साप्रुदिन, सिटी अकिया नुरफद्ला, अजी बागुस सेतियावान, नाइरा हानिफ्फादिला नोअर बुदिमान, बेट्टी अगुस्टिना सुप्रियाटिन, मेटा अज जाह्रा पुत्री, मुहम्मद दिनी अकबर, मुहम्मद अल्लाम नाज्ह्लिफा, एएफआरएल आरएलजेडकेएल, सिफा अलिफा युसुफ, मुहम्मद राफ्दी फौजान, मुमान, मुहम्मद खैरुदिन, बेला ग्रासेभा अमान्दा पुत्री र दिनी अब्दिलाह रहेका छन् ।

जिल्ला प्रहरी कार्यालय लमजुङका प्रमुख, प्रहरी नायब उपरीक्षक जितेन्द्रबहादुर बस्नेतका अनुसार उनीहरूलाई डाइनेस्टी हेलिकप्टरमार्फत उद्धार गरी लमजुङको बेँसीसहर नगरपालिका-७, सहजी ल्याइएको हो। उद्धार कार्यका लागि जिल्ला प्रहरी कार्यालयबाट प्रहरी हबल्दार गुञ्जबहादुर बरामको नेतृत्वमा चार जनाको सुरक्षा टोली पनि परिचालन गरिएको थियो।

सुरक्षित रूपमा लमजुङ ल्याइएका सबै इन्डोनेसियाली पर्यटकहरूलाई ग१ज ३७४० र बा.प्र.०१-००७ ख १६८० नम्बरका सवारीसाधनमार्फत गन्तव्यतर्फ अर्थात् पोखरातर्फ पठााइएको प्रहरीले जनाएको छ।