गुड फ्राइडे सिनेमा

सरकारी मन्त्री वा नेताहरूको भ्रमण भएका बाटो वा ठाउँमा आममानिसलाई निषेध गरिएको हुन्छ। नेपालमा होस् वा भारतमा, जनप्रतिनिधिकै कारण भोग्नुपर्ने यस्तो समस्या असामान्य हुँदा पनि सामान्य रूपमा लिनुपर्ने बाध्यता छ। ‘वान’ फिल्मका किशोर पात्र समल (म्याथ्यु थोमस) पनि यस्तै समस्याको शिकार हुन्छन्।

उनका बुबालाई अस्पतालमा लगेका बेला केरला राज्यका मुख्यमन्त्री कडकल चन्द्रन (मामुट्टी) आउँदा सुरक्षाकर्मीहरूले समललाई रोक्छन्। उनलाई सुरक्षाकर्मीले अपमानित पनि गर्छन्। समलकी साथीले उनलाई सामाजिक सञ्जालमा पहिचान नखुलाई त्यस घटनाको विरोधमा मनमा लागेको कुरा लेख्न लगाउँछिन्। समलको पोस्ट भाइरल भइदिन्छ।

यो घटनालाई विपक्षी दलका नेताहरूले अवसरका रूपमा लिन्छन् र मुख्यमन्त्रीविरूद्धमा हडताल र आन्दोलन गर्न थाल्छन्। त्यस घटनाबाट डराएर भाग्न लाग्दा समललाई पक्रेर मुख्यमन्त्रीकहाँ लगिन्छ। तर समल र उनका बुबाको डर विपरीत मुख्यमन्त्रीले प्रेसका मान्छेहरूका सामु आफूबाट भएको गल्तीका लागि क्षमा माग्छन्।

फिल्ममा यो घटना समल र मुख्यमन्त्री बनेका फिल्मका मुख्य पात्रलाई जोड्ने सन्दर्भका रूपमा आउँछ। सँगसँगै त्यो घटनामा आफ्नो गल्ती सहजै स्विकारेको देखाएर मुख्यमन्त्रीको उदार चरित्र पनि स्थापित गरिएको छ।

त्यसपछि फिल्म मुख्यमन्त्री पात्रकै सेरोफेरो घुम्छ। यी मुख्य मन्त्री पार्टी र सरकारभन्दा माथि उठेर सोच्नुपर्छ भन्ने मान्यता बोक्छन्। ठूला पद ओगटेका नेताहरूलाई समेत कारबाही गर्न नहिच्किचाउने उनीसँग वर्षौं पुरानो एउटा सपना हुन्छ। त्यो सपना हो, संसदमा ‘राइट टु रिकल’ बिल पास गर्नु।

तर यस अभियानमा उनी फिल्मको नाम ‘वान’ भनिएझैं एक्लो पर्छन्।

जनप्रतिनिधि भनेको जनताको लागि काम गर्ने मान्छे हो भन्ने उनले चाल्ने हरेक कदमले विपक्षी दलका राजनीतिज्ञलाई मात्र नभई आफ्नै दलभित्रकालाई पनि चिढ्याउँछ। उनीहरू मुख्यमन्त्रीलाई धेरै आदर्शवादी नहुने सल्लाह दिँदै भन्छन्- यो व्यवहारिक छैन।

यस क्रममा उनलाई संकटमा साथ दिने साथी बबीसमेत असन्तुष्ट हुन्छन्। यसैबीच उनको स्वास्थ्यमा पनि समस्या देखिन थालेको हुन्छ। शारीरिक र मानसिक संघर्षसँगै मुख्यमन्त्रीले राजनीतिक प्रतिस्पर्धीसँग निरन्तर लड्नुपर्छ।

यो फिल्मले प्रतिकूल परिस्थितिमा एक्लै लड्ने इच्छाशक्ति र धैर्य भएका राजनीतिज्ञको कथा भन्छ। यो कथालाई राजनीतिज्ञहरूको संसारमा सीमित गरिएको छैन। विभिन्न घटनाका माध्यमबाट केरला र भारतका आममानिसका समस्या र चाहनासँग जोड्ने प्रयास पनि गरिएको छ।

भारतको लोकतन्त्रमा देखिएका समस्याहरू उजागर गर्ने क्रममा फिल्ममा राजनीतिक क्षेत्रमा व्याप्त भ्रष्टाचार र गैरजवाफदेहीतालाई ठूलो समस्याका रूपमा देखाइएको छ। फिल्ममा जयनन्दन (मुरली गोपी) को नेतृत्वमा रहेको विपक्षी दलले सत्ता र शक्तिमुखि राजनीतिको प्रतिनिधित्व गर्छ। अर्कोतिर मुख्यमन्त्री आदर्श र जनमुखी राजनीतिका प्रतीक हुन्।

बलिउड फिल्म ‘नायक’ को झल्को आउने खालको ‘पोलिटिकल ड्रामा’ वानमा मुख्यमन्त्रीको भूमिकामा म्यामुट्टीको उपस्थिति शक्तिशाली छ। मलयालम फिल्मका ठूला अभिनेता मानिने उनको शारीरिक हाउभाउ र डायलग डेलिभरीले प्रभावित गर्छ। धैर्यवान् र शालीन राजनीतिज्ञका रूपमा उनी जमेका छन्।

फिल्मका अन्य पात्रको अभिनय पनि सुहाउँदो छ। फिल्मको साजसज्जा र सिनेमाटोग्राफीले पनि आकर्षित गर्छ। मामुट्टीको स्टारडम र अन्य केही सबल पक्षका बाबजुद फिल्मले राजनीतिक समस्यालाई देखाउने क्रममा पुराना सूत्रलाई छोड्न सकेको छैन।

मुख्यमन्त्रीले आफ्नै राजनीतिक दलभित्र र विपक्षी दलसँग गर्ने संवाद अझ प्रभावकारी हुन सक्थ्यो। फिल्ममा राजनीतिक क्षेत्रमा हुने संवाद र द्वन्द्वका केही रोचक दृश्य देख्न पाइए पनि यो व्यवसायिक फिल्म हो। सन्तोष विश्वनाथद्वारा निर्देशित यो मलयालम फिल्म सन् २०२१ मा सार्वजनिक भएको हो।