पोखरा, ११ भदौं । नेपाली सङ्गीत क्षेत्रमा आफ्नो बेग्लै पहिचान बनाएका गायक, सङ्गीतकार तथा रचनाकार प्रशान्त पौडेलको नयाँ म्युजिक भिडियो भाद्र १३ गते रिलिज हुने भएको छ। सयौँ हिट गीतहरूमार्फत दर्शक र श्रोताको मन जितेका पौडेलको नयाँ गीत “भए तिम्रै हुने हो, नभए एक्लै काट्छु जुनि यो” को म्युजिक भिडियो रिलिजको तयारीमा छ।

पौडेलले आफ्नै शब्द, सङ्गीत र स्वरमा तयार पारेको यो गीत वेब रेकर्डिङ स्टुडियोमार्फत रेकर्ड गरिएको हो। गीतमा उनलाई गायिका बेनिसा पौडेलले साथ दिएकी छन्। म्युजिक भिडियोमा प्रशान्तले पोखराकी युवा व्यवसायी मञ्जु बिष्टसँग स्क्रिन सेयर गरेका छन्। मञ्जुको यो पहिलो म्युजिक भिडियो हो, जुन उनको आफ्नै ओएसिस क्रिएसन पोखराको प्रस्तुतिमा बजारमा आउँदैछ।

यो म्युजिक भिडियो अनिल के. मानन्धरले निर्देशन गरेका छन् भने दिनशन शाहले सम्पादन र नरेन्द्र बियोगीले मिक्सिङ गरेका छन्। गीत प्रशान्त पौडेलको आधिकारिक युट्युब च्यानल “प्रशान्त पौडेल युट्युब च्यानल” मार्फत भाद्र १३ गते शुक्रबार रिलिज हुनेछ।

प्रशान्त पौडेल विगत १५ वर्षदेखि सङ्गीत क्षेत्रमा सक्रिय छन्। उनको “सान्नानी” बोलको गीतले युट्युबमा करोड क्लबमा प्रवेश गरिसकेको छ। सरल र अन्तर्मुखी स्वभावका पौडेल गायन, रचना र सङ्गीतसँगै अभिनयमा पनि उत्तिकै रुचि राख्छन्। उनको यो नयाँ गीत र म्युजिक भिडियोले पनि दर्शक र श्रोताको मन जित्ने अपेक्षा गरिएको छ।