पोखरा, १० असार । देशको विविध सांस्कृतिक र प्राकृतिक सौन्दर्यलाई संगीतमार्फत उजागर गर्ने अभियानमा जुटिरहेका सिबिरिगोले आफ्नो नयाँ म्युजिकल फिल्म ‘बतासजस्तै’ सार्वजनिक गरेका छन्। कास्कीको रमणीय कोरि गाउँमा छायांकन गरिएको यस भिडियोले नेपालभित्रको सौन्दर्य मात्र होइन, परदेशिएको पुस्ताको वेदनासमेत अभिव्यक्त गरेको छ।

नेपालका ७० जिल्ला पार गर्दै राष्ट्रिय अभियानमा जुटेका सिबिरिगोले “घर, माटो र परिवारको माया“ बोक्ने गीतमार्फत आजको पुस्ताको वास्तविकता चित्रण गर्न खोजेका छन्।

भिडियोमा जुना गुरुङ र बाल कलाकार नियति गुरुङको मन छुने अभिनय देख्न सकिन्छ। संवाद, अभिनय र समग्र अवधारणामा सिबिरिगोकै कलात्मक हस्तक्षेप छ। गायिका सुनीता थेगिमको सुमधुर स्वरमा सजिएको यो गीतमा मविन्द्र राईका शब्द र संगीत छन् भने निर्देशन अनिल के मानन्धरले गरेका हुन्।

सिक्लेस र कोरिका स्वाभाविक र शान्त वातावरणभित्र छायांकन गरिएको दृश्यहरू हेर्दा दर्शकलाई आफ्नै गाउँ, आफ्नै सपना र आफ्नै पीडा सम्झाइदिन्छ।

भिडियो ‘ब्याकप्याकर फिल्म नेपाल’ युट्युब च्यानलमार्फत हेर्न सकिनेछ।