पोखरा, २२ असार । चलचित्र पत्रकार संघ नेपाल कास्कीको २२ औं स्थापना दिवसका अवसरमा शुक्रबार पोखरामा आयोजित शुभकामना आदानप्रदान तथा चियापान कार्यक्रम विविध धारणा, सुझाव र प्रेरणादायी मन्तव्यसहित सम्पन्न भएको छ।

संस्थापक अध्यक्ष श्रीराम सिग्देलले संघभित्र देखा परेका नेतृत्वसम्बन्धी समस्याको समाधानमा आफूले पहल लिएको उल्लेख गर्दै केन्द्रबाट अधिवेशनका लागि परिपत्र आएपछि छैटौं अधिवेशन गरिने जानकारी दिए। उनले २०६० साल असार २२ गते कास्की शाखाको स्थापना भएको स्मरण गर्दै संघले चुनौतीपूर्ण यात्राबाट अनुभव बटुलेको बताए।

पत्रकारिता सुदृढीकरण र नेतृत्व स्थायित्वका सन्देशहरू
संघका सल्लाहकार सुरेश रानाभाटले विधान र कार्यविधिलाई ‘संस्थाको अक्सिजन’ भन्दै कास्की शाखालाई देशकै उत्कृष्ट शाखाका रूपमा चित्रित गरे।

नेपाल पत्रकार महासंघ गण्डकी प्रदेश अध्यक्ष रमेश पौडेलले “मिडिया नै कलाकारलाई चिनाउने मूल माध्यम हो“ भन्दै चलचित्रसम्बन्धी गतिविधि बढाउनुपर्नेमा जोड दिए।

नेपाल पत्रकार महासंघ कास्कीका अध्यक्ष माधव बरालले संघ अब युवा चरणमा प्रवेश गरेको भन्दै यसलाई गतिशील राख्न सबैको सहकार्य आवश्यक भएको बताए। उनले नेतृत्वविहीनताको समस्या समाधान गर्दै अगाडि बढ्न सुझाव पनि दिए।

चलचित्र र पत्रकारिताका अन्तरसम्बन्धमा जोड
कलाकार प्रकाश घिमिरेले फिल्म पत्रकारितामा निष्पक्ष मूल्यांकनको आवश्यकता औंल्याउँदै भने, “पैसा कमाउने फिल्म मात्र होइन, उत्कृष्ट कलात्मक फिल्मलाई पनि खुलेर समर्थन गर्नुपर्छ।”

त्यस्तै, कलाकार माओत्से गुरुङले चलचित्र पत्रकारिता परिस्कृत गर्न र चलचित्र ऐनका त्रुटि सच्याउन मिडियाको भूमिका अपरिहार्य रहेको बताए।

संघका पूर्व उपाध्यक्ष राजाराम पौडेलले नेतृत्वको कार्यकाल पूरा गर्नुपर्ने र ‘सिनेमा संवाद’ कार्यक्रमलाई अझ प्रभावकारी बनाउनु पर्ने सुझाव दिए।

पत्रकार विजय नेपालले चलचित्र पत्रकारका लागि तालिम, फेलोसिप र गोष्ठी सञ्चालन गर्न आग्रह गरे।

संस्थाको भविष्य र सुदृढीकरणमा सबैको चासो
संघका सचिव सन्तोष बस्यालले संस्थाको हालको अवस्थाबारे जानकारी गराउँदै भविष्यमा अझ संगठित ढंगले अघि बढ्ने योजना सुनाए।
कार्यक्रमको अध्यक्षता संस्थापक अध्यक्ष श्रीराम सिग्देलले गरेका थिए।

कार्यक्रममा सहभागी वक्ताहरूले संघको भूमिकालाई थप सुदृढ, समावेशी र प्रभावकारी बनाउन विविध सुझावहरू प्रस्तुत गरे।

चलचित्र पत्रकार संघको स्थापना २०५६ साल जेठ ७ गते केन्द्रमा भरत शाक्यको अध्यक्षतामा भएको थियो भने पोखरामा शाखा विस्तार २०६० साल असार २२ गतेबाट सुरु गरिएको थियो।