पोखरा । जनपत्रकार संगठन कास्कीले पोखरापाटी मिडिया प्रा.लि.का सञ्चालक एवम् पोखरापाटी डटकमका सहसम्पादक राजुकमार घिमिरेको तत्काल रिहाईको माग गरेको छ । जिल्ला प्रहरी कार्यालय कास्कीले मंसिर ८ गते पक्राउ परेका पत्रकारसहित अन्य व्यक्तिहरुलाई आजसम्म सार्वजनिक गरेको छैन । पत्रकार घिमिरेलाई आजसम्म पनि कास्की प्रहरीले पक्राउ पुर्जी समेत नदिई मानसकि यातना दिदैं गैरन्यायिक थुनामा राखेको छ ।
कास्की संयोजक रमाकान्त बास्तोलाले जिल्ला प्रहरी कार्यालय कास्कीले पत्रकार घिमिरेलाई अपहरण शैलीमा पक्राउ गरेकोप्रति ध्यानाकर्षण भएको बताएका छन् । गत मंसीर ८ गते पोखरा महानगरपालिका वडा नं. ३३ देउरालीस्थित बस्तीबाट जिल्ला प्रहरी कार्यालय कास्कीको टोलीले पक्राउ गरेको थियो ।
यसरी पक्राउ परेका पत्रकार घिमिरेलाई आजसम्म जिल्ला प्रहरी कार्यालय कास्कीले पक्राउ पुर्जीसम्म नदिएको उनको परिवारले बताएको छ । नेत्रविक्रम चन्द ‘विप्लव’ नेतृत्वको प्रतिबन्धित नेपाल कम्युनिष्ट पार्टीले गत मंसिर ८ गते सातौं पार्टी पुनर्गठन दिवसको अवसरमा आयोजना गरेको जनसभाको समाचार संकलनका लागि पत्रकार घिमिरे त्यहाँ पुगेका थिए । सोही क्रममा पत्रकार घिमिरेलाई प्रहरीले पक्राउ गरेको हो ।
विचार र आस्थाका अधारमा पछिल्लो समय पत्रकारहरुमाथि धरपकड बढाउने, अनावश्यक दुःख दिने, समाचार संकलन गर्न पुग्दा विभिन्न तरिकाले मानसिक यातना दिने जस्ता गम्भिर मानवअधिकार र प्रेस स्वतन्त्रता विरोधी गतिविधि सरकारले बढाउँदै लगेको विज्ञप्तिमा उल्लेख छ ।
पत्रकारमाथि प्रशासनको अनावश्यक हस्तक्षेपले संविधानले दिएको मौलिक हकमाथि नै सरकारले कुण्ठित गर्ने काम गरेको भन्दै यस्ता खाले हर्कत रोक्न र गैरन्यायिक हिरासतमा रहेका पत्रकार घिमिरेलाई विना शर्त रिहाई गर्न संयोजक बास्तोलाले माग गरेका छन् । विज्ञप्तिमा संविधानले प्रत्याभूत गरेको प्रेस अभिव्यक्ति, आस्था र विचारको स्वतन्त्रतालाई सम्मान गर्न आग्रह गरिएको छ ।