काठमाडौं, १० कात्तिक । नेपाल कम्युनिष्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले छठ पर्वको अवसरमा शुभकामना व्यक्त गर्दै परिवर्तन पक्षधर शक्तिहरूलाई आपसी सम्मान, सामाजिक सद्भाव र सहकार्यको भावनालाई बलियो बनाएर समृद्ध र समाजवादी नेपाल निर्माणमा जुट्न आह्वान गरेका छन्।

शुभकामना सन्देशमा उनले भनेका छन्, “हामी सबै परिवर्तन पक्षधर शक्तिहरू एकजुट भएर आपसी सम्मान र सहकार्यका साथ समृद्ध, न्यायपूर्ण र समाजवादी नेपाल निर्माणमा अघि बढौं।” उनले हालको जटिल राजनीतिक, आर्थिक र सामाजिक परिस्थितिमा छठ पर्वले प्रदान गर्ने आत्मबल, धैर्य र आशावादको सन्देश निकै महत्वपूर्ण रहेको उल्लेख गरे।

प्रचण्डले छठ पर्वले मानव र प्रकृतिबीचको गहिरो सम्बन्धलाई जोड्दै सहअस्तित्व, सन्तुलन र आत्मशुद्धिको चेतना जगाउने बताएका छन्। “यो पर्वले मनको अँध्यारो हटाएर उज्यालो, पवित्रता र सकारात्मक ऊर्जा प्रदान गरोस्। देशमा शान्ति, समृद्धि र स्थायित्वको नयाँ प्रभात उदाओस्,” उनले भने।

मधेश–तराईको प्रमुख चाड छठले नेपालको संस्कृति, परम्परा, श्रम र जनजीवनसँग जोडिएको गहिरो महत्व राख्छ। यो पर्वले सामाजिक एकता र प्रकृतिप्रतिको कृतज्ञतालाई प्रोत्साहन गर्ने उनको भनाइ छ।