काठमाडौं, २४ असोज । आचरण उल्लंघन तथा संगठनको छविमा आँच पुर्‍याएको ठहर गर्दै गृह मन्त्रालयले सशस्त्र प्रहरी अतिरिक्त महानिरीक्षक (एआईजी) वंशीराज दाहाललाई सेवाबाट हटाएको छ। गृह मन्त्रालयले दाहाललाई असोज २३ गतेदेखि लागू हुने गरी विभागीय कारबाही गर्दै सेवाबाट बर्खास्त गरेको हो।

गृह मन्त्रालयका सहसचिव एवं प्रवक्ता आनन्द काफ्लेले शुक्रबार जारी गरेको विज्ञप्तिअनुसार, पटक–पटक आचरण उल्लंघन गरेको, अनुशासनहीन काम गरेको र सरकार तथा कार्यरत संगठनको मानप्रतिष्ठामा गम्भीर क्षति पुर्‍याएकाले उनीमाथि यो कारबाही गरिएको हो।

चार वर्षे पदावधि सकिएर यही असोज २७ गते अनिवार्य अवकाशमा जान लागेका दाहाललाई अवकाशको साताअघि नै सेवाबाट हटाइएको छ। सशस्त्र प्रहरी मुख्यालयले नियमावलीअनुसार उनको पदावधि एक वर्ष थप गर्न गृह मन्त्रालयमा प्रस्तावसमेत पठाइसकेको थियो।

इनाम सापकोटा नामक व्यक्तिसँग सुरक्षासम्बन्धी संवेदनशील विषयमा कुराकानी गरेको प्रमाण भेटिएपछि एआईजी दाहाल निलम्बनमा परेका थिए। गृह मन्त्रालयले छानबिनका लागि एआईजी अञ्जनी पोखरेललाई जाँचबुझ अधिकृत तोकेको थियो।

जाँचबुझ अधिकृत पोखरेलले बिहीबार बुझाएको छानबिन प्रतिवेदनमा दाहालले प्रधानमन्त्रीसँग सम्बन्धित संवेदनशील सूचनासमेत आदानप्रदान गरेको प्रमाण संलग्न छ। छानबिनका क्रममा लिइएको बयानमा दाहालले सापकोटा आफ्नो जिल्लावासी भएको र उनीसँग संवाद भएको स्वीकार गरेका छन्।

छानबिन समितिले सशस्त्र प्रहरी नियमावली, २०७२ को नियम ११० र ११३ मा व्यवस्था भएबमोजिम विशेष सजायस्वरूप सेवाबाट हटाउने वा बर्खास्त गर्ने सिफारिस गरेको थियो। सोही प्रतिवेदनका आधारमा मन्त्रालयले बर्खास्तको निर्णय गरेको हो।

यसअघि पूर्वप्रधानन्यायाधीश चोलेन्द्र शम्शेर राणा पक्राउ पर्दा एआईजी दाहाल राति नै काठमाडौं उपत्यका अपराध अनुसन्धान कार्यालय पुगेका कारणसमेत विवादमा आएका थिए।