पोखरा, २८ कार्तिक । दीपक गोदार पोखरा महानगर खेलकुद विकास समिति अध्यक्षमा पुनः नियुक्त भएका छन् । उनी दोस्रो कार्यकालका लागि हालै चयन भएका हुन् ।

पहिलो कार्यकाल सकिएको झन्डै १४ महिनापछि महानगरपालिकाले खेलकुद विकास ऐन, २०७५ बमोजिम पदाधिकारी नियुक्ति गरेको हो । आगामी तीन वर्षका लागि अध्यक्ष बनेका गोदारको खेलकुद क्षेत्रमा करिब ३५ वर्षको अनुभव छ ।

पोखरा–१७, घारीपाटनका स्थायी बासिन्दा गोदार नेपाल मुआथाई संघका प्रमुख प्रशिक्षक हुन् । कराते प्रशिक्षकसमेत रहेका उनको मार्गदर्शनमा गण्डकी प्रदेशले छैटौंदेखि नवौं राष्ट्रिय खेलकुदसम्म करातेमा सर्वाधिक पदक जित्दै च्याम्पियन बनेको थियो ।

दोस्रो कार्यकालमा गोदारले ग्रासरुट स्तरबाट खेलकुद गतिविधि सञ्चालन गरी खेलाडी उत्पादनमा जोड दिने बताएका छन् । उनले १५ वटा राष्ट्रिय तथा अन्तर्राष्ट्रिय प्रतियोगिता आयोजना गर्ने लक्ष्य राखेका छन् ।