पोखरा । गण्डकी प्रदेश मन्त्रिपरिषद्को बैठकको निर्णय आज सार्वजनिक गर्दै म्याग्दी जिल्लालाई पनि विपत संकतग्रस्त जिल्ला घोषणा गरिएको छ । यस अघि बाग्लुङ जिल्लालाई घोषणा गरिएको थियो । कार्तिक २ गते बसेको मन्त्रिपरिषद्को निर्णय आज सार्वजनिक गर्दै सरकारका प्रवक्ता समेत रहेका भौतिक पूर्वाधार विकास मन्त्री रामशरण बस्नेतले उक्त जानकारी दिनुभएको हो ।

बर्षाको समयमा ठुलो विपत आयो । धेरै मानिसहरु हताहत भए । धेरै घरहरु भत्किए । अरु कति वस्तीहरु स्थान्तरण गर्नुपर्ने स्थिति रह्यो । गण्डकी प्रदेशमा पनि यस्तै ठुलो विपत आईलागेको बताउँदै सरकारका प्रवक्ता बस्नेतले म्याग्दी जिल्लामा मृतकहरुको संख्या धेरै नै रहेको र ठुलो धनजनको क्षति भएका कारणले म्याग्दी जिल्लालाई पनि विपत संकटग्रस्त जिल्ला घोषणा गर्न नेपाल सरकारलाई सिफारिश गरिएको बताउनुभयो ।

फेवातालको चारकिल्ला निर्धारण, सिमाङ्खन, नक्साङ्खन गर्न समितिको संयोजकमा पूण्य पौडेल
त्यसैगरी, उहाँले फेवातालको चारकिल्ला निर्धारण, सिमांकन, नक्साङ्कन गर्न समिति गठन गर्ने मन्त्रिपरिषद्को निर्णय अनुसार संयोजक मात्र प्रदेश सरकारले तोक्ने काम गरेको बताउनुभयो । प्रवक्ता बस्नेतले यो कामको लागि अन्नपूर्ण गाउँपालिका वडा नं. ३ बस्ने पूण्य पौडेललाई संयोजक तोकिएको बताउनुभयो ।