पोखरा, १५ चैत्र । पोखरा महानगरपालिकाले आफ्नो क्षेत्रभित्रका अति तथा मध्यम गरिब घर परिवारलाई निःशुल्क स्वास्थ्य बिमा गरिदिने भएको छ । यसका लागि महानगरपालिका र स्वास्थ्य बिमा बोर्ड गण्डकी प्रदेशबीच सम्झौता भइसकेको छ ।

महानगरपालिकाले विपन्न नागरिक स्वास्थ्य बिमा कार्यान्वयन कार्यविधि २०८२, स्वास्थ्य बिमा ऐन तथा नियमावलीअनुसार यो कार्यक्रम सञ्चालन गर्न लागेको हो । भूमि व्यवस्था, सहकारी तथा गरिबी निवारण मन्त्रालयबाट प्राप्त गरिब घर धुरीको सूचीका आधारमा २०८३ जेठ मसान्तसम्म लक्षित वर्गको स्वास्थ्य बिमा गरिने छ ।

स्वास्थ्य बिमा नियमावली २०७५ अनुसार ५ जनासम्म सदस्य भएको परिवारको लागि प्रति परिवार ३५०० रुपैयाँ र ५ जना भन्दा बढी सदस्य भएमा थप प्रत्येक सदस्यको लागि ७०० रुपैयाँ बिमा प्रिमियम महानगरपालिकाले स्वास्थ्य बिमा बोर्डलाई उपलब्ध गराउनेछ ।

यो निःशुल्क बिमा कार्यक्रममा सहभागी हुन वा नवीकरण गर्न सम्बन्धित वडा कार्यालयबाट अति तथा मध्यम गरिब घर परिवारको पहिचान सिफारिस लिनुपर्नेछ । दर्ता सहयोगीमार्फत फाराम भरेर स्वास्थ्य महाशाखामा आवेदन दिन सकिनेछ । आवश्यक प्रक्रिया पूरा गरी फाराम स्वास्थ्य बिमा बोर्डमा पठाइने र सूचना प्रणालीमा दर्ता गरिने छ ।

महानगरपालिकाले लक्षित वर्गलाई यो कार्यक्रमबाट लाभ लिन अनुरोध गरेको छ । दर्ता सहयोगीहरूलाई आवश्यक अभिमुखीकरण पनि गरिने भएको छ ।

नगर प्रमुख धनराज आचार्यले आर्थिक अवस्था कमजोर भएका कारण आधारभूत स्वास्थ्य सेवाबाट वञ्चित वर्गलाई यो कार्यक्रमले ठूलो राहत मिल्ने बताए । मेयर आचार्यले महानगरपालिका सम्पूर्ण नगरवासीको स्वास्थ्य सुरक्षा र प्रवद्र्धनका लागि प्रतिबद्ध रहेको दावी पनि गरे ।

स्वास्थ्य महाशाखा प्रमुख भरतराज पौडेलका अनुसार यो कार्यक्रमले पोखरा महानगर क्षेत्रमा गरिबीको रेखामुनि रहेका परिवारको स्वास्थ्य सुरक्षामा महत्वपूर्ण योगदान पुग्ने विश्वास गरिएको छ ।