लमजुङ, ९ कार्तिक । लमजुङे चेली कमला घिमिरेले एकै साथ दुई कृतिको लोकार्पण गरेकी छिन् । महाकवि लक्ष्मीप्रसाद देवकोटाको ११४ औँ लक्ष्मी जन्मजयन्तीको अवसर पारेर घिमिरेले काठमाडौंमा आयोजना गरिएको एक कार्यक्रममा ती कृतिहरु लोकार्पण गरिएको हो ।

देवकोटाको जन्मजयन्तीको अवसरमा पेरोल साहित्य प्रतिष्ठानद्वारा आयोजित कार्यक्रममा लमजुङकी कमला घिमिरेका हाइकु संग्रह ‘महको महल’ र बाल कविता संग्रह ‘मामाघर’ को लोकार्पण गरिएको थियो । सोहि अवसरमा विके पाल्पालीको ‘हाइकु कसरी लेख्ने सिद्धान्त सूत्र’ महेश पौड्यालद्वारा अनूदित ‘द हाइकु थेरोटिकल म्यान्युल’ गरी तीन कृतिको लोकार्पण गरिएको थियो ।

१७ अक्षरमा सिमित रहेर ३ लाईनमा लेखिने हाइकु कवितामा प्राकृतिक बिम्वलाई प्रमुख आधार मानेर प्राकृतिक छटा, राजनीतिक घटनाक्रमलाई ब्यङ्ग गरिएको छ । पुरुष र प्रकृतिलाई प्राकृतिक बिम्बको रुपमा उतारिएको छ । त्यस्तै बालकविता संग्रह ‘मामाघरमा’ विभिन्न शिर्षकमा १५ वटा बालकबिता रहेका छन् ।

कृतिकार कमला घिमिरेले सुरुसुरुमा लेखेर बालबालिकालाई सुनाउने मात्रै गरेको र लकडाउनको समय उपयोग गर्दै सम्पादन गरेको सिर्जनालाई पुस्तकाकार रूप दिएको बताईन् । उनले समसामयिक कविता, लघु कथा, हाईकु, बालकविता लगायतका विधामा कलम चलाउँदै आएकी छिन् । लमजुङको बेसिशहर वडा नं. ३ माईती र दोर्दी भारते घर भई हाल काठमाडौंमा बसोबास गर्दै आएकी घिमिरे पेशाले शिक्षक हुन् ।