काठमाडौं, १३ कार्तिक । सर्वोच्च अदालतको फूलकोर्ट बैठकमा इनम सापकोटाको मोबाइलमा देखिएका न्यायाधीशहरूको नाम र सम्बन्धको विषयले ठूलो हलचल मच्चायो। शुक्रबार डाकिएको यस पूर्ण बैठकमा न्यायाधीशहरूले इनम सापकोटाले प्रधानन्यायाधीश डा. मनोज शर्माको नाम लिएको र न्यायाधीश हरि फुयालले सापकोटालाई भेटेको प्रसंगलाई गम्भीरतापूर्वक उठाएका थिए।

प्रधानन्यायाधीश शर्मा र न्यायाधीश फुयालले आफ्ना भनाइ स्पष्ट रूपमा राखे पनि न्यायाधीशहरूले सार्वजनिक भइसकेका यी विवरणहरूको गहिरो अध्ययन गर्न न्यायपालिकाभित्रै स्वतन्त्र समिति गठन गर्नुपर्ने सुझाव दिएका छन्। वरिष्ठतम् न्यायाधीश सपना प्रधान मल्ल विदेश भ्रमणमा र न्यायाधीश अब्दुल अजीज मुसलमान बिदामा रहेकाले विस्तृत छलफलका लागि सोमबार फेरि फूलकोर्ट बैठक डाक्ने सहमति भएको एक न्यायाधीशले जानकारी दिएका छन्।