नवलपुर, २२ जेठ । स्वतन्त्र पत्रकार संघ नेपालको राष्ट्रिय अध्यक्षमा पुनः कृष्णप्रसाद बास्तोला निर्वाचित भएका छन् । संघको नवलपरासीमा शनिबार सम्पन्न १०औं वार्षिक साधारण सभा तथा चौथो अधिवेशनले बास्तोलाको अध्यक्षतामा नयाँ कार्य समितिको सर्वसम्मत चयन गरेको हो ।

आगामी दुई वर्षका लागि सर्वसम्मत चयन भएको कार्यसमितिको वरिष्ठ उपाध्यक्षमा काठमाडौंका केबि सम्राट, उपाध्यक्षमा कास्कीकी तिर्सनालक्ष्मी गुरुङ, बाँकेका नीरज गौतम र रुपन्देहीका वीरेन्द्र पाण्डे रहेका छन् । त्यसैगरी महासचिवमा काठमाडौंका महेशविक्रम कुँवर, उपमहासचिवमा क्रमशः मकवानपुरका सुरेश श्रेष्ठ र रत्नकाजी प्रजापति र कास्कीका कल्याण पन्त चयन भएका छन् । कोषाध्यक्षमा ललितपुरका बद्रीबहादुर दुलाल, सहकोषाध्यक्षमा रुपन्देहीकी सीता दर्नाल निर्वाचित भएका छन् ।

त्यसैगरी सदस्यहरुमा शरद शर्मा (दाङ), प्रेमबहादुर बुढाथोकी (रुपन्देही), डिलाराम भण्डारी (दाङ), निर्मला पोखरेल निरु (सुनसरी), दाङका जीतसागर जिएम (जनजातितर्फ) र दीपक कुमाल (अल्पसंख्यकतर्फ) निर्वाचित भएका छन् ।

स्वतन्त्र पत्रकार संघ नेपालका संस्थापक अध्यक्ष कृष्णप्रसाद बास्तोलाले २०६८ सालमा नेपाल पत्रकार महासंघ कास्की शाखामा राजनीतिक भाडवण्डाका आधारमा नेकपा एमालेका कार्यकर्ता बद्री बिनोद प्रतिकको अध्यक्षतामा नयाँ कार्य समिति बनाईएपछि त्यसविरुद्ध आन्दोलित पत्रकारहरुले स्वतन्त्र पत्रकार संघ गठन गरेको स्मरण गराए । २८ जिल्लामा बिस्तार भईसकेको संघले सो अवसरमा विभिन्न पत्रकारहरुलाई पुरस्कृत पनि गरेको थियो ।

पुनः अध्यक्षमा निर्वाचित भएका बास्तोलाले सदस्यहरुको सल्लाह र सुझावमा अघि बढ्ने र संस्थाका सदस्यको विश्वासलाई कुठाराघात नगर्ने प्रतिवद्धता व्यक्त गरे । तर स्वतन्त्र पत्रकार संघले पत्रकारहरुको हक, हित र समस्याका बारेमा आफ्नो उपस्थिति भने दरो रुपमा देखाउन सकिरहेको छैन ।