ईच्छुक धावकहरूले पोखरा क्लिक  अनलाइनमार्फत फाराम भरी दर्ता प्रक्रिया पूरा गर्न सक्नेछन् ।

पोखरा, १९ असोज । पोखरामा आगामी शनिबार आयोजना हुने तेस्रो संस्करणको खुला पर्वतीय दौड प्रतियोगिताको सम्पूर्ण तयारी अन्तिम चरणमा पुगेको छ । पोखरा क्लीक र पोखरा प्रवद्र्धन केन्द्रको संयुक्त आयोजनामा हुने यस प्रतियोगितालाई भव्य रूपमा सम्पन्न गर्न विभिन्न उपसमितिहरूले काम गरिरहेको शनिबार आयोजित पत्रकार सम्मेलनमार्फत जानकारी गराइएको छ ।

खेलकुदका माध्यमबाट ग्रामीण पर्यटन र कृषि अर्थतन्त्रलाई एकसाथ जोड्ने मुख्य उद्देश्यसहित यो प्रतियोगिता आयोजना गरिएको हो । पोखरा महानगरपालिका वडा नं. २२ स्थित विश्व शान्ति स्तूपाबाट सुरु हुने ८ किलोमिटरको यो दौड कालाबाङ घरेडी बुद्ध पार्कमा पुगेर समापन हुनेछ । दौडको रुट विश्व शान्ति स्तूपाबाट अघि बढेर प्रसिद्ध पुम्दीकोट विशाल महादेवको मूर्ति परिक्रमा गर्दै वडा कार्यालय हुँदै न्यालेडाँडास्थित गन्तव्यमा पुग्नेछ ।

प्रतियोगितामा सहभागिताका लागि आगामी असोज २१ गते राति १२ बजेसम्म नाम दर्ताको समयसीमा तोकिएको छ । ईच्छुक धावकहरूले पोखरा क्लिक अनलाइनमार्फत फाराम भरी दर्ता प्रक्रिया पूरा गर्न सक्नेछन् । प्रतियोगिता संयोजक दीननाथ बरालका अनुसार हालसम्म देशका १८ वटा जिल्लाबाट ८० भन्दा बढी धावकहरूले आफ्नो नाम दर्ता गराइसकेका छन् ।

पत्रकार सम्मेलनमा बोल्दै पोखरा २२ का वडाध्यक्ष हिमलाल बरालले पर्वतीय दौड अब पुम्दीभुम्दी क्षेत्रको मुख्य पहिचान बनिसकेको बताए । यसले यस क्षेत्रको पर्यटन प्रवद्र्धनमा बहुआयामिक योगदान पुर्‍याउने उनको विश्वास छ ।

त्यस्तै, पोखरा पर्यटन परिषद्का अध्यक्ष हरि भुजेल र नेपाल पत्रकार महासंघ कास्कीका अध्यक्ष माधव बरालले खेलकुदले पोखराको समग्र पर्यटन, स्थानीय अर्थतन्त्र र कृषि क्षेत्रको विकासमा सकारात्मक प्रभाव पार्ने बताउँदै प्रतियोगितालाई सफल बनाउन सबै संघसंस्थाले पूर्ण सहयोग गर्ने प्रतिबद्धता व्यक्त गरे ।

कालाबाङ घरेडी बुद्ध पार्क समितिका अध्यक्ष राज गुरुङ ‘लाल’ले यस किसिमका कार्यक्रमले पुम्दीभुम्दी मात्र नभई समग्र पोखराको पर्यटनलाई चलायमान बनाउन सहयोग पुग्ने बताए । कार्यक्रमको सञ्चालन आयोजक केन्द्रका उपाध्यक्ष असफल गौतमले गरेका थिए ।

प्रतियोगितामा कुल ६ वटा विभिन्न इभेन्टहरू समावेश गरिएको छ, जसमा खुला, वडास्तरीय, महिला, यू-१६, विदेशी र भेट्रान्स विधा रहेका छन् । प्रतियोगितालाई थप प्रतिस्पर्धी र आकर्षक बनाउन नगद पुरस्कारको समेत व्यवस्था गरिएको छ ।

खुला इभेन्टः प्रथम हुनेले ५० हजार, द्वितीयले ३० हजार, तृतीयले १५ हजार, चौथोले ७ हजार र पाँचौँले ३ हजार रुपैयाँ नगद प्राप्त गर्नेछन् । साथै छैटौँदेखि दशौँ स्थानसम्मका धावकलाई जनही १ हजार रुपैयाँसहित मेडल र प्रमाणपत्र प्रदान गरिनेछ ।

वडास्तरीय, महिला तथा यू–१६ इभेन्टः यी प्रत्येक विधामा प्रथम, द्वितीय र तृतीय हुनेले क्रमशः १५ हजार, ७ हजार र ३ हजार रुपैयाँ नगद पुरस्कार प्राप्त गर्नेछन् ।

विदेशी धावकः विजेताले १५ हजार र उपविजेताले ७ हजार रुपैयाँ नगद प्राप्त गर्नेछन् ।

भेट्रान्स इभेन्टः विजेता धावकलाई १५ हजार रुपैयाँ नगद, मेडल र प्रमाणपत्रद्वारा सम्मानित गरिनेछ ।