पोखरा । साझा पार्टीका प्रवक्ता शरदराज पाठकले आज एक विज्ञप्ति जारी गर्दैं सरकारलाई नै ठाडो चूनौंती दिएका छन् । ‘कसले रोक्दो रहेछ, हेरौं !’ भन्दै सिधै सरकारको निर्णय गलत भएकोले अवज्ञा गर्ने विज्ञप्तिमा उल्लेख छ ।

केही परोपकारी समूहहरूले महिनौँदेखि काठमाडौँ खुलामञ्चमा यो संकटको घडीमा रोजगारविहीन असहायहरूलाई खाना खुवाउँदै आएकोमा त्यसलाई रोक्न काठमाडौँ महानगरपालिकाले दिएको निर्देशनको साझा पार्टीले घोर भत्र्सना गर्दै त्यस निर्देशनलाई ठाडै अवज्ञाको निर्णय पनि गरेको हो ।

‘कोरोना संक्रमणका कारण श्रमिक तथा असहायहरू भोकभोकै मर्नु पर्ने अवस्था सृजना भएका बेला सरकार स्वयंले आफ्ना सम्पूर्ण संयन्त्र परिचालन गरेर उनीहरूको हेरचाह गर्नु पर्दथ्यो’, विज्ञप्तिमा भनिएको छ–‘तर उल्टो नागरिकस्तरबाट भइरहेको परोपकारी कार्य समेत रोक्न निर्देशन दिनु अमानवीयताको पराकाष्ठा हो ।’

सरकारको सो कदमको विरोध जनाउन भोलि बुधबार बिहान र बेलुका खुलामञ्चमा खुवाईने खानाको खर्च साझा पार्टीका सदस्य तथा शुभेच्छुकहरूले व्यर्होने पनि विज्ञप्तिमा उल्लेख छ । साझा पार्टीका स्वयंसेवीहरू खाना खुवाउने कार्यमा सरिक हुन विज्ञप्ति मार्फत् आह्वान गरिएको छ । शान्तिपूर्ण रूपमा गरिने यस्तो मानवीय कार्यलाई हेरौँ कसरी रोक्दो रहेछ, यो निर्दयी सरकारले भन्दै साझा पार्टीले खुल्ला चूनौंती दिएको छ ।

साझा पार्टीको उक्त कदम महिनौँदेखि निरन्तर रूपमा अतुलनीय शुभ कार्य गरिरहेका परोपकारी समूहप्रतिको नैतिक र सानो आर्थिक सहयोग मात्र हो भन्दै विज्ञप्तिमा साझा पार्टी नेपालभित्र र बाहिर रहेका सबै नेपालीलाई खुलामञ्च लगायतका स्थानमा दैनिक सयौँ नेपाली दाजुभाइ, दिदीबहिनीको पीडामा मल्हम लगाइरहेका समूहहरूलाई सहयोग गर्न अपिल समेत गरिएको छ ।

‘सरकारले तुरुन्त आफ्नो निर्णय फिर्ता गरोस् र कोरोना कहर कायम रहुन्जेल श्रमिक तथा असहायहरूलाई कि ‘काम’को व्यवस्था गरोस्’, विज्ञप्तिमा भनिएको छ–‘कि ‘माम’को व्यवस्था गरोस् ।’