बागलुङ, ५ भदौ । बागलुङको काठेखोला गाउँपालिका–३ माझँकटेरामा सँगै ज्याला मजदुरी (लेबर) काम गर्ने साथीको धारिलो हतियार प्रहार गरी हत्या गरेको आरोपमा प्रहरीले दुई जनालाई पक्राउ गरेको छ।

पक्राउ पर्नेहरूमा ढोरपाटन नगरपालिका–६ घर भएका २५ वर्षीय अर्जुन घर्ती मगर र सोही नगरपालिका वडा नं. ५ घर भएका ३६ वर्षीय रिखे दमाई रहेका छन्। उनीहरूमाथि ढोरपाटन नगरपालिका–५ निवासी ३६ वर्षीय अशोक खत्रीको हत्या गरेको गम्भीर आरोप छ।

प्रहरीको अनुसन्धान अनुसार गत साउन २६ गते राति करिब ९ः४० बजेको समयमा काठेखोला–३ स्थित श्री निर्मल आधारभूत विद्यालयको पुरानो भवनमा बस्दै आएका खत्रीमाथि अर्जुन घर्ती मगरले धारिलो चक्कु प्रहार गरेका थिए। हतियार प्रहारबाट गम्भीर घाइते भएका खत्रीको घटनास्थलमै मृत्यु भएको थियो। घटनाको सूचना पाएसँगै सक्रिय बनेको प्रहरी टोलीले स्थानीय बासिन्दाको सहयोगमा उनीहरूलाई भाग्न नपाउँदै सोही दिन राति काठेखोला–३ धम्जा माझँकटेराबाटै नियन्त्रणमा लिएको हो।

प्रारम्भिक अनुसन्धानबाट यो जघन्य अपराध फोनमा भएको सामान्य भनाभनबाट सुरु भएको खुलेको छ। गत साउन २० गते स्थानीय देवेन्द्र खत्रीको ओखरको बिरुवा रोप्ने कामका लागि उनीहरू घरबाट हिँडेका थिए। बीचबाटोबाट अशोक खत्री घर फर्किए पनि अन्य दुई जना भने काममा पुगेका थिए। पछि साउन २४ गते अशोक पनि सोही स्थानमा पुगेपछि तीनै जना सँगै बस्दै आएका थिए।

साउन २५ गते राति फोनमा ठूलो स्वरमा कुरा गरेको विषयलाई लिएर उनीहरूबीच सामान्य झैझगडा भएको थियो। त्यसको भोलिपल्ट अर्थात् साउन २६ गते काम सकेर मादक पदार्थ सेवन गर्ने क्रममा अघिल्लो दिनको विवाद फेरि बल्झिएको र रिसको झोकमा घर्ती मगरले खत्रीमाथि चक्कु प्रहार गरेको प्रहरीको भनाइ छ।

यता, यस दुःखद घटनाले एक परिवारको बिचल्ली बनाएको छ। मृतक खत्रीका १२, ९ र ७ वर्षका तीन छोरा छन् भने उनकी श्रीमती हाल गर्भवती छिन्। सम्पूर्ण परिवार मृतक खत्रीकै कमाइमा आश्रित रहँदै आएको थियो। घटनापछि मृतककी श्रीमती दिलमाया भण्डारीले कर्तव्य ज्यान कसुरमा किटानी जाहेरी दिएकी छन्।

प्रहरीले घटनामा प्रयोग भएको चक्कु र रगतले लतपतिएका कपडासमेत बरामद गरिसकेको छ। अदालतबाट म्याद थप अनुमति लिई पक्राउ परेका दुवै जनाविरुद्ध प्रहरीले हाल थप अनुसन्धान अगाडि बढाइरहेको छ।