काठमाडौँ । दुर्घटनामा एक स्थानीय व्यवसायीको मृत्युको विषयलाई लिएर स्थानीयले प्रदर्शन चर्काएपछि सर्लाही प्रशासनले ईश्वरपुर नगरपालिकास्थित बयलबास बजार क्षेत्रमा मंगलबारबाट २८ घण्टे निषेधाज्ञा जारी गरेको छ ।

प्रमुख जिल्ला अधिकारी स्थानेश्वर गौतमले मंगलबार सूचना जारी गर्दै मंगलबार दिउँसो ३ देखि बुधबार साँझ ७ बजेसम्म निषेधाज्ञा लगाएको जानकारी गराएका हुन् ।

प्रजिअ गौतमका अनुसार ईलाका प्रहरी कार्यालय केशरगंजबाट पूर्व सागरनाथ टोलसम्म, पश्चिममा रामपुर टोलसम्म, उत्तरमा सखुवनी टोलसम्म र दक्षिणमा खोरिया टोलसम्मको क्षेत्रमा निषेधाज्ञा जारी गरिएको छ ।

निषेधाज्ञा लगाएका स्थानमा कुनै भेला, हिँडडुल र राजनीतिक गतिविधि गर्न नपाउने सूचनामा जनाइएको छ। आइतबार गस्तीमा निस्केको प्रहरी भ्यानमा ठोक्किएर बयलबासका एक फेन्सी पसल सञ्चालक रामकुमार महतोको मृत्युपछि स्थानीयले प्रदर्शन गरेका थिए ।