पोखरा । स्याङ्जाका सन्तोष पौडेल मोडलिङमार्फत कला क्षेत्रमा रमाइरहेका छन् । दोस्रो म्युजिक भिडियोमार्फत दर्शकको मन जितेका पौडेल मोडलिङमै भविष्य बनाउने अभियानमा पनि छन् । उनको दोस्रो म्युजिक भिडियो चर्चित लोक तथा दोहोरी गायिका प्रिति आलेको शब्द र स्वरमा ‘नयाँ साथी’ हालै सार्वजनिक भएको छ ।

गायिका आलेको आफ्नै युट्युब च्यानलमार्फत सार्वजनिक भएको म्युजिक भिडियोमा सन्तोष जोडिएका हुन् । दुई वर्ष अघि प्रकाश न्यौपानेको शब्द, प्रिति आले र जय देवकोटाको तीज गीत ‘खरि झ¥यो कि’बाट उनले मोडलिङ करियर सुरु गरेका थिए ।

लोकपप शैलीमा तयार पारिएको गीतको म्युजिक भिडियोमा सन्तोषसँगै गायिका प्रिति आले, रञ्जन पाण्डे, विवेक क्षत्री, हरिप्रसाद रेग्मी, विक्रम गुरुङ, रवि श्रेष्ठ, प्रकाश अधिकारीलगायतले पनि अभिनय गरेका छन् । सानैदेखि गीत संगीतमा रुची राख्ने सन्तोषले पहिलो तीज गीतबाट भन्दा पनि हालै सार्वजनिक भएको ‘नयाँ साथी’बाट सकारात्मक प्रतिक्रिया पाएको बताए ।

स्याङ्जाको आँधीखोला गाउँपालिका–३ शान्तिडाँडामा जन्मिएका सन्तोष हाल बैंकिङ क्षेत्रमा कार्यरत छन् । बैंकिङ क्षेत्रसँगै मोडलिङलाई पनि सँगसँगै लैजाने लक्ष्य राखेका उनी दर्शकहरूको सकारात्मक प्रतिक्रियाबाट निकै हौसिएका छन् । ‘सानैदेखि गीत संगीतमा रुची राख्थे ।

मेरो कामलाई सबैले सकारात्मक प्रतिक्रिया दिएका छन् । उहाँहरू सबैको प्रेरणाले निकै हौसला मिलेको छ’, उनी भन्छन्, ‘दर्शक स्रोताले माया गरिरहनु भएको छ । सानैदेखिको रुचीको क्षेत्र भएकाले मोडलिङलाई पनि निरन्तरता दिन्छु ।’ यस क्षेत्रमा निकै प्रतिस्पर्धा भए पनि आफ्नो मेहनतले सबैको मन जित्ने विश्वास उनको छ ।

उनले म्युजिक भिडियोसँगै प्रिति आलेको स्वर र शब्दमा लोकपप गीत निकै उत्कृष्ट रहेको बताए । विषेशगरी माया प्रेमको भाव समेटेर तयार पारिएको म्युजिक भिडियो प्राविधिक हिसाबले पनि उत्कृष्ट भएको दाबी सन्तोषले गरे । ‘यो गीत साँच्चै मन छुने खालको छ । गीतलाई स्रोता अनि दर्शकले पनि निकै रुचाउने विश्वास गरेको छु’, उनले भने ।