News Portal

ताजा शिर्षकहरु

चर्चित शिर्षकहरु

धर्म-सस्कृति समाचार

मौलिकपन जोगाउन कलाकार सङ्घको देउसीभैलो

पोखरा, २० कात्तिक । पोखरा साङ्गीतिक कलाकार सङ्घले तिहारमा खेलिने देउसीभैलोको मौलिकपन हराउँदै गएको भन्दै यसलाई जोगाउन पहल गरेको छ ।

बजारमा रेकर्ड गरिएका गीतमा नाचगान गर्दै देउसीभैलो खेल्न थालेर मौलिक संस्कृति लोप हुँदै जाने देखिएकाले त्यसलाई अन्त्य गर्न कलाकारले आफैँ गाउँदै र नाच्दै पोखराका विभिन्न ठाउँमा भैलो खेलेका हुन् ।

देउसीभैलो कार्यक्रमको नेतृत्व सङ्घका अध्यक्ष सुनिल थापाले गर्नुभएको र उहाँको समूहमा आनन्दराज बज्राचार्य, शान्तराज बज्राचार्य, भाइ गुरुङ, भाष्करध्वज श्रेष्ठलगायतसदस्यहरु हनुहुन्थ्यो । समूहलाई पोखराको चर्चित हिमाली सांस्कृतिक परिवारका सदस्यहरूले साथ दिएका थिए ।

भैलोको मौलिकता हराउँदै गएकाले आफूहरुले संरक्षणका लागि भैलो खेलेको सङ्घका अध्यक्ष थापाले बताउनुभयो । उहाँले भन्नुभयो, “हिजोआज अर्काको रेकर्डेड गीत पेनड्राइभबाट बजायो, नाच्यो, सकियो । यसबाट हाम्रो मौलिक संस्कृति लोप हुँदैछ, यसलाई बचाउन हामीले आफँै गाउने, आफैँले बाजा बजाउने र आफैँ नाच्दै देउसीभैलो खेलिरहेका छौँ ।”

पोखराका गैहपाटन, चिप्लेढुङ्गा, विरौटालगायत स्थानमा भैलो खेलेको सङ्घले आगामी वर्ष पनि यसलाई निरन्तरता दिने सोचाइमा रहेको र सङ्कलन भएको रकम सङ्घको कोषमा राखेर कलाकारलाई कुनै समस्या पर्दा खर्च गरिने बताइएको छ ।