राजनीतिबाट टाढा रहेर न त समाज चल्छ, न त देश नैं । नेता भ्रष्ट भए भनिरहँदा कार्यकर्ताहरुले आफूलाई पनि हेर्नु पर्ने समय आईसकेको छ । समाजले जबसम्म दलाल, भ्रष्ट, तस्कर, विचौंलिया लगायतका अपराधिक मनोवृत्तिका पात्रहरुका विषयमा विरोध गर्न सक्दैन, तबसम्म यो देशमा सुशासनको कल्पना नगर्दा हुन्छ । जब हामी जनताहरु नैं भ्रष्टाचारीलाई नमस्ते गरिरहन्छौं, तबसम्म समाज भ्रष्टाचारमुक्त हुन सक्दैन । नक्कली भुटानी शरणार्थी काण्डले राजनीतिमा मौंलाएको दलाली र भ्रष्टाचारको खेललाई उदाङ्गो मात्र बनाएको छैन, समाजलाई सचेत पनि गराएको छ । यसबाट हामी सबैले पाठ सिक्न जरुरी छ ।

यतिबेलाको सरकारले भ्रष्टाचारीहरुलाई कारवाही गरिरहँदा उठिरहेका प्रश्नहरुले हाम्रो देश कहाँ पुगेको छ भन्ने तथ्यलाई छर्लङ्ग पारेको छ । भ्रष्टाचारका काण्डै काण्ड छन् । जसलाई नेताहरुले आआफ्ना स्वार्थ अनुरुप ढाकछोप गरिरहेका छन् । हुँदाहुँदैं एउटा दलको सरकारले भ्रष्टाचारको विषयलाई छानबिन गर्यो भने अर्को प्रतिपक्ष दलले फलानो भ्रष्टाचारको मुद्दा पनि खोलियोस् भनेर सदनमा आवाज उठाई रहेका दिनदिनैं सुनिएकै छ । वेथितिको पराकाष्ठा कहाँसम्म छ भन्ने तथ्य अहिलेको नक्कली भुटानी शरणार्थी काण्डले ल्याएको हलचललाई हेर्दा पनि प्रष्ट नै हुन्छ । यी भन्दा जटिल भ्रष्टाचारका मुद्दाहरु धेरै बाँकी छन् अनुसन्धान हुन । तर यतिबेला दलहरुले आफू जोगिन ५ बर्ष भन्दा बढि समय भ्रष्टाचारको विषयमा छानबिन हुन नपाउने भनेर कानुन बनाउँदै छन् । यसले प्रष्ट हुन्छ कि सदनमा भ्रष्टाचारीहरुको संख्या कति छ र भ्रष्टाचारको जरा कहाँ कहाँसम्म पुगेको छ भनेर ।

कुनै पनि दल यतिबेला भ्रष्टाचारको वाछिटोबाट जोगिन सकेको छैन । दल भित्रका भ्रष्ट नेता र कार्यकर्तालाई तत्कालै दलहरुले कारवाही गर्न सक्ने अवस्था नै छैन । यसरी भ्रष्टाचारका काण्डहरु छानबिन हुँदै गए भने एक एक गरेर भ्रष्ट पात्रहरु नाङ्गिदैं र कारवाहीको दायरामा आए भने समाजमा सुशासन कायम होला । नत्र सबै दलहरु भ्रष्टाचारको दलदलमा यसरी डुबेका छन् कि भ्रष्टाचारीलाई कारवाही गर्ने दम कुनै दलका नेताहरुसँग नै छैन । अहिले यो वा त्यो दल नै भनेर किटान गर्नुपर्ने अवस्था रहेन । सबै दलको हविगत आमजनताहरुले छर्लङ्ग देखिरहेका छन् । अब दलहरु भित्र रहेका इमान्दार नेता र कार्यकर्ताहरुले देश बनाउने र समाजलाई परिवर्तन गर्ने हो भने भ्रष्टाचारको मुद्दालाई इमान्दारिताका साथ उठाउन जरुरी छ । दलहरु भित्र भएका भ्रष्ट, तस्कर, माफिया, दलाल र विचौंलियाहरुलाई क्रमशः यसरी नैं कारवाहीको दायरामा ल्याउन सके दलहरुको विश्वसनीयता बढ्नेमात्र होइन देशमा सुशासनको अवस्थामा पनि सुदृढ हुने निश्चित छ ।