पोखरा, २६ जेठ । ”जीवन र जगतको यथार्थवोधका लागि अक्षरयात्रा” मूल मन्त्र बनाई नवनीत साहित्य सागर र गजल सन्ध्याद्वारा हरेक महिनाको तेस्रो शनिबार सञ्चालन हुँदै आएको नियमित यात्रा साहित्यिक कार्यक्रमको १८७ औं श्रृङ्खला शनिबार कास्कीकै पुरानो ऐतिहासिक धार्मिक तिर्थस्थल हरिहर गुफा सन्यास आश्रम भलाममा सम्पन्न भयो ।

अक्षरयात्रामा प्रकट पगेनी ‘शिव’, लक्ष्मण थापा, अमृत, प्रमिला पौडेल, संगिता आभास, माधव खतिवडा, दिनेश बस्नेत, जीवन पौडेल र संगम लामिछाने लगायतले रचना वाचन गरेका थिए । कार्यक्रम हरिहर गुफा सन्यास आश्रम ब्यवस्थापन समितिको स्थानीय ब्यवस्थापनमा भएको थियो ।

कार्यक्रममा स्वामी इशानानन्दले आफ्नो मन्तव्य राखेका थिए । स्वामीले पोखराको मुकुट भनेर चिनीने धार्मिक स्थल ओझेल परे जस्तो देखिनु दुस्खद भएको भन्दै अब कलमजिवीहरुले यो क्षेत्रको प्रचारप्रसार गर्नु पर्ने बताए ।कार्यक्रममा बोल्दै अर्का वक्ता आश्रममा उपाध्यक्ष अर्जुन बहादुर क्षेत्रीले आश्रम क्षेत्र पवित्र अध्यात्मिक भुमी भएको तथा यहाँ आउने जो कोहीले पनि आत्मिक आनन्द प्राप्त गर्न गरेको बताए ।आश्रम पृथ्वीकै भूस्वर्ग भएको भन्दै चिन्ने जान्नेहरु यहाँ आइरहेको पनि बताए । कार्यक्रम गजल सन्ध्याका अध्यक्ष बसन्त विनोदको अध्यक्षता र सुरज उपाध्यायको संचालनमा भएको थियो ।