पोखरा, ७ पुस । कोभिड महामारीले मनोरञ्जन क्षेत्रमा पुरै ध्वस्त बनाएको अवस्थामा सिनेमा प्रदर्शनले यसलाई केही भएपनी मलमपट्टि लगाउने प्रयास गरेका छन् । मनोरञ्जन तथा फेसनका कार्यक्रमहरु त झन् ठप्प जस्तै बनेको बेलामा यहि पुसको २३ गते, शुक्रबार पोखरामा “मन गुरुङ एटाएर फेसन नाईट” हुने भएको छ ।

मिस नेपाल ईन्टरनेशनल २०१७ बिजेता तथा सुपर मोडल नीति शाह मुख्य आर्कषण रहने उक्त कार्यक्रममा पोखराका चर्चित १० जना मोडलहरुले र्‍याम्प शेयर गर्नेछन् । अंग्रेजी नयाँ वर्षको एक हप्ता पछि अर्थात जनवरी ७ मा हुने फेसन नाईटमा पोखरा देखि फेशन डिजाइनको सुरुवात गरेकी फेशन डिजाईनर मन गुरुङले निर्माण गरेका विभिन्न थरिका पोशाकहरुको विशेष प्रदर्शनी हुने आयोजक संस्था एस।टि। क्रियशन म्यानेजमेन्ट प्रा।लिका प्रबन्ध निर्देशक सुरज थापाले बताए ।

डेन्टल बिषयमा डिप्लोमा सकेर डेन्टल हाईजिनिस्टको रुपमा कार्यरत समेत रहेकी गुरुङले आफ्नो रुचिको बिषय फेसन डिजाइन भएकोले सन् २०१७ मा पोखराकै एक मात्र फेशन कलेज आई।एफ।सी फेसन कलेज बाट डिप्लोमा ईन फेसन डिजाईनिङ कोर्स गरेकी थिईन् । पोखरामा आयोजना हुने विभिन्न फेसन सो तथा सौन्दर्य प्रतियोगिताहरुमा आफ्नो ड्रेसको कौशलता प्रदर्शन गरिसकेकी छ्न् । “यो मेरो एकल पहिलो फेसन सो हो, आफुले सिकेको सिप र कलालाई कार्यक्रमका माध्यमबाट प्रस्तुत गर्दै फेसन डिजाईनिङ क्षेत्रमा फरक नाम लेखाउने उदेश्य बोकेर कार्यक्रम लिएर आएकि छु । म आशावादी छु कि यस कार्यक्रमलाई सबैले सफल बनाउन साथ र सहयोग गर्नु हुनेछ।” (उनी भन्छिन् ।

कार्यक्रमबाट खर्च कटाएर बचेको रकमबाट पोखरामा रहेका फरक क्षमता भएका करिब २० जना बालबालिकाहरुलाई न्यानो कपडा बितरण गर्ने उद्देश्य रहेको कार्यक्रमका प्रमुख सल्लाहकार तथा सामाजिक अभियन्ता राम रानाभाटले जानकारी दिएका छन् ।

पोखराको लेकसाईड स्थित कुटी रिसोर्टमा संचालन हुने कार्यक्रममा फेशन शो संगै बिशेष साँगितिक प्रस्तुती रहने कार्यक्रम संयोजक सचिन रानाभाटले जानकारी गराए । करिब २ घण्टा सम्म चल्ने उक्त कार्यक्रम टेलिभिजन र सामाजिक संजाल मार्फत प्रत्यक्ष प्रसारण हुने आयोजकले जनाएको छ ।

मोडल तथा कोरियोग्राफर जेनिता मगरले उक्त फेशन नाईटको कोरियोग्राफी गर्ने कार्यक्रमलाई ईनिशा दुरामगरले संचालन गर्नेछिन् ।