काठमाडौँ । साहित्यकार वानीरा गिरिको हृदयघातका कारण आइतबार राति निधन भएको छ । बीपी कोइरालाको ‘तीन घुम्ती’ र लियो टोल्सटोयको ‘अन्ना करेनिना’ उपन्यासलाई शैली र लेखन प्रेरणाका कृति मान्ने ७६ वर्षीय वानीरा उपन्यास, कविता र निबन्ध लेखनमा फरक दृष्टिकोण र शैलीका कारण परिचित थिईन् ।

मानवतावादी र प्रकृतिवादी लेखक भनेर चिनिने वानीरा झण्डै ३ वर्षयता अल्जाइमर्स रोगबाट ग्रसित भएर घरमै आपत्कालीन स्वास्थ्य सेवा लिइरहेकी थिईन् । हृदयघात हुनु भन्दा ३ साताअघि वानीरालाई कोरोना पोजिटिभसमेत देखिएको थियो । आइतबार राति अचानक हृदयघात भएपछि निजामती अस्पतालमा उपचारका लागि लगिएको थियो । उपचार कैं क्रममा साहित्यकार डा.वानीराको निधन भएको हो ।

‘शब्दातीत शान्तनु’ उपन्यासका लागि २०५६ सालको साझा पुरस्कार पाएकी साहित्यकार वानीराका ‘कारागार’, ‘निर्बन्ध’ र ‘शब्दातित सान्तनु’ उपन्यास तथा ‘मेरो आविष्कार’, ‘जीवन : थायमरु’, ‘एउटा एउटा जिउँदो जंगबहादुर’ कविता संग्रहहरु प्रकाशित छन् ।

वानिरा गिरीको जन्म २००२ साल चैत २९ गते दार्जिलिङको खर्साङमा भएको थियो । तत्कालीन राजा महेन्द्रद्वारा प्रदान गरिएको छात्रवृत्तिमा २०२२ सालमा एमए पढ्न उनी काठमाडौँ आएकी थिइन् । कवि गोपालप्रसाद रिमालका कवितामाथि त्रिभुवन विश्वविद्यालयबाट विद्यावारिधि गरेकी वानीराले लामो समय पद्मकन्या क्याम्पसमा प्राध्यापन गरेकी थिइन् । उनी नेपाली साहित्यमा विद्यावारिधि गर्ने प्रथम महिला पनि हुन् । वानीराका श्रीमान (इन्जिनियर शंकर गिरी), एक छोरा अपूर्ण र एक छोरी अपराजिता छन् ।