पोखरा, २ फागुन । पर्यटकीय नगरी पोखराको प्रसिद्ध फेवातालमा माछा मार्ने जालमा अड्किएर सेल्फ लोडिङ राइफल (एसएलआर) फेला परेको छ। उक्त हतियारमा १८ राउन्ड गोली लोड गरिएको अवस्थामा एक थान म्यागजिन पनि संलग्न थियो।

जिल्ला प्रहरी कार्यालय कास्कीका अनुसार, पोखरा महानगरपालिका–१८ खपौँदीका ४२ वर्षीय स्थानीय कुमार जलारीले बिहीबार दिउँसो माछा मार्न जाल हानेका क्रममा ताल किनार नजिकै उक्त हतियार जालमा फसेको अवस्थामा भेटिएको हो। सूचना प्राप्त हुनासाथ प्रहरी टोली खटिएर हतियार बरामद गरेको थियो।

कास्की प्रहरीका प्रवक्ता डीएसपी हरिबहादुर बस्नेतका अनुसार, बरामद एसएलआर राइफलमा दर्ता नम्बर मु.वा. १११ (बट) र बडी नम्बर १३८१० लेखिएको छ। हतियार दर्ता भएको देखिए पनि हालसम्म कसको नाममा दर्ता भएको हो भन्ने खुल्न सकेको छैन। यसबारे पुष्टि गर्न प्रहरी प्रधान कार्यालयमा पत्राचार गरिएको र केही दिनभित्रै विवरण प्राप्त हुने उनले बताए।

‘फेवातालमा भेटिएको एसएलआर राइफल दर्ता भएकै देखिन्छ। कसको हो भनेर बुझ्न हाम्रो हेडक्वार्टरमा लेखी पठाएका छौं,’ डीएसपी बस्नेतले भने, ‘केही दिनमै थाहा हुन्छ। बरामद हतियारलाई सुरक्षित राखी आवश्यक कारबाही अघि बढाइरहेको छ।’

हतियारको मालिक र दर्तावालाको पहिचान खुलेपछि कसरी तथा कुन परिस्थितिमा यो अत्याधुनिक हतियार फेवातालमा पुग्यो भन्ने विषयमा थप अनुसन्धान अघि बढाइने प्रहरीले जनाएको छ। यस घटनाले ताल क्षेत्रको सुरक्षा र अवैध हतियार नियन्त्रणबारे प्रश्न उठाएको छ।