पोखरा, २ फागुन । पोखरा महानगरपालिका–६ पामेस्थित गैह्राकोचौतरा नजिक फेवातालमा शनिबार बिहान कार खस्दा एक युवकको मृत्यु भएको छ । मृत्यु हुनेमा स्याङ्जाको फेदीखोला गाउँपालिका–५ का स्थायी बासिन्दा तथा हाल पोखरा महानगरपालिका–७ मासबार बस्दै आएका २४ वर्षीय अदित गुरुङ रहेका छन्। उनीसँगैं रहेका दुईजना भने सकुशल रहेका छन् ।
दुर्घटना शनिबार बिहान करिब २ः१० बजे भएको थियो। बीएए १५८२ नम्बरको कार अनियन्त्रित भई गैह्राको चौतारा नजिकबाट फेवातालमा खसेको सशस्त्र प्रहरी बल नेपाल नं. २४ गण हे. क्वा. कालिकाले जनाएको छ।

घटनास्थलमा सशस्त्र प्रहरी उपरीक्षक बसन्तबहादुर सिंहको कमान्डमा २१ जनाको टोली (डीएम र गोताखोरसहित) खटिएको थियो। गोताखोर टोलीले कारबाट अचेत अवस्थामा रहेका गुरुङलाई बाहिर निकालेर गण्डकी मेडिकल कलेज पु¥याएको थियो। तर, उपचारका क्रममा बिहान ४ः३४ बजे चिकित्सकले उनलाई मृत घोषणा गरेका थिए।

कारलाई क्रेनको सहायताले तालबाट निकालिएको छ। थप अनुसन्धान तथा कारबाहीका लागि वडा प्रहरी कार्यालय बैदाम लगिएको छ। प्रहरीले दुर्घटनाको कारणबारे अनुसन्धान जारी राखेको छ। अत्याधिक मदिरा सेवन गरी सवारी हाँक्दा सो दुर्घटना भएको प्रहरीको भनाई छ ।