पोखरा, १३ फागुन । कास्की निर्वाचन क्षेत्र नम्बर २ मा स्वतन्त्र उम्मेदवारी दिएका युवा अभियन्ता निर्दोष विक्रम पौडेलले आफ्नो उम्मेदवारी फिर्ता लिएका छन्। उनले नेपाली कांग्रेसका आधिकारिक उम्मेदवार माधव प्रसाद बास्तोला (मधु)लाई पूर्ण समर्थन गर्दै मतदातालाई उनको पक्षमा मतदान गर्न अपिल गरेका छन्।

पौडेलले जारी गरेको विज्ञप्तिमा आफ्नो राजनीतिक यात्रा जनता, पीडा र भविष्यको आवाज बोकेर सुरु भएको बताएका छन्। उनले यो यात्रा पद, सत्ता वा व्यक्तिगत स्वार्थका लागि नभई युवाको आत्मसम्मान, अवसर र सुरक्षित भविष्यका लागि भएको उल्लेख गरेका छन्।

तर, वर्तमान राजनीतिक परिस्थिति, पार्टीको स्पष्ट दृष्टिकोण, माधव प्रसाद बास्तोलाको निष्ठा, इमानदारी र युवामैत्री सोच तथा पार्टीले प्रस्तुत गरेको प्रतिबद्धता पत्रलाई आत्मसात् गर्दै उनले आफ्नो उम्मेदवारी फिर्ता लिएको बताएका छन्। उनले कांग्रेसको बदलिएको रूप र रुख चिन्हमा मतदान गर्न मतदातालाई आग्रह गरेका छन्।

विज्ञप्तिमा उनले भनेका छन्, ‘आज उम्मेदवारी फिर्ता लिएको छु, तर आवाज फिर्ता लिएको छैन। आज सहयोग गरेको छु, तर प्रश्न सोध्ने अधिकार गुमाएको छैन। अब हाम्रो साझा बाटो एउटै छ, युवाको भरोसा बोकेको नेतृत्वलाई विजयी गराउने, कास्की–२ लाई भविष्यसँग जोड्ने।’

उनले सम्पूर्ण मतदाता, दिदीबहिनी तथा दाजुभाइहरूलाई रुख चिन्हमा माधव प्रसाद बास्तोला (मधु)लाई विजयी बनाउन हार्दिक अपिल गरेका छन्। यो विजय कुनै एक व्यक्तिको नभई युवाको, भविष्यको र एकताको हुने उनको भनाइ छ।

निर्दोष विक्रम पौडेल पूर्व नेविसंघ नेता तथा युवा अभियन्ताका रूपमा चिनिन्छन्। यो घटनाले कास्की–२ मा कांग्रेसको एकता र माधव बास्तोलाको पक्षमा थप बल पुग्ने देखिन्छ। आगामी प्रतिनिधिसभा निर्वाचन (फागुन २१ गते) मा यो क्षेत्रमा कांग्रेसका बास्तोला, एमालेका रश्मी आचार्य, रास्वपाका उत्तम पौडेल र नेपाली कम्युनिष्ट पार्टीका किरण थापा बीच मुख्य प्रतिस्पर्धा  हुँदैंछ ।