पोखरा । कोरोना संक्रमित भएकै अवस्थामा हतार–हतार शिलान्यास गर्दै हिडेका गण्डकी प्रदेशका निवर्तमान मुख्यमन्त्री पृथ्वीसुब्बा गुरुङले सरकार परिवर्तन हुने भएपछि बजेटमा नै नभएका आयोजनाहरु ठेक्कामा लगाएको रहस्य खुलेको छ ।

निवर्तमान मुख्यमन्त्री गुरुङले १० वटा बहुवर्षे आयोजनामा ४ अर्ब ५१ करोड रुपैयाँको ठेक्का लगाएको सरकारका प्रवक्ता एवम् सामाजिक विकासमन्त्री कुमार खड्काले जानकारी दिएका छन् । प्रवक्ता खड्काले भने–‘अघिल्लो सरकारले जाँदाजाँदै रातो किताबभन्दा बाहिरको योजनामा यसरी ठेक्का प्रक्रिया अघि बढाएछ । यो ठेक्का खोल्ने हो भने प्रदेशमा बजेटै बाँकी रहँदैन ।’

प्रवक्ता खड्काले ती १० वटा योजनाको सूची सार्वजनिक गर्दै भने–‘बहुवर्षीय योजना अन्तर्गतका ती योजनामा कुनै प्राविधिक रुपमा अध्ययन भइसकेका छैनन् भने कुनैमा विस्तृत परियोजना प्रतिवेदनसमेत बनेका छैनन् ।’

कार्यकर्तालाई पोस्न रकम रकमान्तर गरिएको आक्षेप लागेपछि प्रवक्ता खड्काले जुनसुकै सरकार आएपनि रकमान्तर गर्ने गरेको र आफूहरुले पनि त्यसैलाई निरन्तरता दिएको दावी गरे । प्रवक्ता खड्काले भने–‘ गिरिजाप्रसाददेखि ओली सरकारसम्मले रकमान्तर गर्ने गरेका छन् । नयाँ सरकार भएकाले आफूहरुसँग पनि जनताको अपेक्षा गर्ने भएकाले रकमान्तर गरिएको हो ।’

प्रवक्ता खड्काले रकमान्तर गरिएको उक्त रकम ३० प्रतिशत पनि खर्च नहुने दाबी गरे । ‘सबै सरकारले गरेको रकमान्तरलाई हामीले निरन्तरता दिएका हौं । तर, असार २४ सम्म सबै बिल भर्पाइ गरिसक्नु पर्ने भनेका छौं । हेर्नुहोला ७० प्रतिशत पनि काम हुँदैन,’ प्रवक्ता खड्काले भने, ‘त्यो फ्रिज भएर जान्छ । आखिर फर्किने प्रदेशकै ढुकुटीमा हो ।’