लमजुङ । नेपाल सांस्कृतिक संघ केन्द्रीय कार्य समितिले नेपाल पत्रकार महासंघ लमजुङ शाखाका नवनिर्वाचित कार्यसमितिलाई सम्मान गर्दै स्वास्थ्य सुरक्षाका सामाग्री हस्तान्तरण गरेको छ ।

संघका केन्द्रीय सभापति तीर्थ थापाले नेपाल पत्रकार महासंघ लमजुङले स्थापना गरेको कल्याणकारी कोषमा ११ हजार एकसय ११ रुपैयाँ आर्थिक सहयोग पनि गरेका छन् । साथै अग्रमोर्चामा रहेर काम गर्ने पत्रकारहरु महामारीको समयमा झनै जोखिम भएको भन्दै एक कार्टुन माक्स र १० लिटर स्यानिटाईजर पनि कार्यक्रममा हस्तान्तरण गरिएको थियो ।

कार्यक्रमका प्रमुख अतिथि नेपाली कांग्रेस लमजुङका सभापति भेषबहादुर पौडेलले नेपाल सांस्कृतिक संघको केन्द्रीय कार्य समितिलाई धन्यवाद दिदैं लोकतन्त्र संकटमा परेको भन्दै यसको रक्षाका लागि कलाकार र पत्रकारहरुले महत्वपूर्ण भूमिका निर्वाह गर्नुपर्नेमा जोड दिए ।

सांस्कृतिक संघका केन्द्रीय सभापति तीर्थ थापाले थोरै भएपनि सहयोग गर्न पाउँदा खुशी लागेको बताए । अध्यक्ष थापाले आगामी दिनमा पनि संघले नेपाल पत्रकार महासंघ लमजुङ शाखालाई सक्दो सहयोग गर्ने प्रतिवद्धता पनि व्यक्त गरे ।

कार्यक्रममा संघका सभापति थापाले पत्रकार महासंघ लमजुङ शाखाका अध्यक्ष परमेश्वर अधिकारीलाई सम्मानपत्र हस्तान्तरण गर्दै नवनिर्वाचित कार्यसमितिको सफल कार्यकालको कामना गरे ।

उक्त कार्यक्रममा सांस्कृतिक संघका महामन्त्री शिवशंकर रिजाल, प्रवक्ता महेश प्रसाई, सदस्य लेखबहादुर पुन, लमजुङ उद्योग वाणिज्य संघका निवर्तमान अध्यक्ष राजेश थापा लगायतले कोरोना महामारीको अवस्थामा आमजनताको जनजीविकामा गम्भिर असर परेको भन्दै यस विषयमा सञ्चारमाध्यमले सशक्त ढंगले खबरदारी गर्नुपर्नेमा जोड दिए ।