काठमाडौँ । आर्थिक वर्ष २०७८-७९ को बजेटमा पर्यटन क्षेत्रलाई उत्पादनमूलक क्षेत्र सरह सुविधा दिने घोषणा गरिएको छ । अर्थमन्त्री विष्णु पौडेलले विभिन्न क्षेत्रहरुलाई राहत, सहुलियत र आर्थिक पुनरुत्थानका प्याकेजहरुको घोषणा गरेका छन् ।

साथै पर्यटन क्षेत्रलाई पुनर्जीवन दिन कर्मचारीलाई १० दिनको तलब बराबरको पर्यटन भौचर उपलब्ध गराइने भएको छ । अन्य टेलरिङ, ब्युटीपार्लर, वायुसेवा, हेल्थ क्लब लगायत व्यवसायलाई नवीकरण शुल्क छुट दिईको छ । साथै तरकारी, दूध लगायत नाशवान वस्तुको ढुवानी भाडामा २५ प्रतिशत छुट प्रदान गरिएको छ । १६ वर्ष माथिका विद्यार्थीलाई १ प्रतिशत ब्याजदरमा दुई वर्ष अवधिको ऋण दिइने बजेटले घोषणा गरेको छ ।

यसका अतिरिक्त उनले मासिक २० हजार लिटरसम्मको खानेपानी गार्हस्थ उपभोक्तालाई छुट घोषणा गरेका छन् । नेपाल खाद्य व्यवस्था तथा व्यापार कम्पनीले बिक्री गर्ने उपभोग्य वस्तुहरू चामल, पीठो, नुन, तेल, ग्यासमा २० प्रतिशत छुट दिईएको छ । विद्युतको डिमाण्ड शुल्क २० युनिटसम्म शत प्रतिशत, १५० युनिटसम्म सम्म ५० र २५० युनिटसम्म ३० प्रतिशत छुट घोषणा भएको छ । चलचित्र उद्योग र होटल उद्योगलाई विद्युतको डिमाण्ड शुल्क छुट दिने बजेटमा घोषणा गरिएको छ ।

५० अर्ब रुपैयाँको व्यावसायिक कर्जालाई सरकारले आगामी आर्थिक वर्षमा पनि निरन्तरता दिने भएको छ । अर्थमन्त्री पौडेलल ५ प्रतिशत ब्याजदरमा उपलब्ध हुने पुर्नकर्जा सुविधा पनि निरन्तरता पाउने घोषणा गरेका छन् ।

त्यस्तै सहुलियतपूर्ण पुनकर्जा कार्यक्रम अन्तर्गत १० प्रकारका कर्जामा ५ प्रतिशत ब्याज अनुदान दिन अहिलेको बजेटमा १३ अर्ब रुपैयाँ विनियोजन गरिएको छ । निर्माण व्यवसायीले राख्ने बैंक ग्यारेन्टीमध्ये रिटेन्सन मनीका रुपमा ५० प्रतिशत फिर्ता लिएर चालु पुँजीका रूपमा प्रयोग गर्न दिने व्यवस्था गरिएको छ ।