लमजुङ । लमजुङको मध्येनेपाल नगरपालिकाका बाढी पहिरो पीडितलाई अमेरिकामा रहेका नेपालीहरुले आर्थिक सहयोग गरेका छन् । गत वर्खामा आएको वाढी पहिरोले मध्यनेपालस्थित लामासोती पुरानोडिही क्षेत्रका अधिकांश घरपरिवार विस्थापित हुन पुगेका थिए ।

मध्यनेपाल घर भई हाल टेक्सास अमेरिकामा रहनु भएका प्रमोद घिमिरेको संयोजकत्वमा गठित करापुटार अमेरिका समूहले ६ महिना लगाएर २४ लाख २९ हजार १सय ५९ रुपैयाँ संकलन गरेको थियो । सो रकम संकलनका लागि गुगलमा कार्यरत सुयोग सोतीलाई गो फण्ड आयोजक बनाई व्यापक सम्पर्क र संयोजनका लागि करपुटार अमेरिका समूह लागि परेको थियो ।

उक्त संकलित रकम नेपाल रेडक्रस सोसाईटी जिल्ला शाखा लमजुङसँग समन्वय गरी रेडक्रस शाखाको बैंक खातामा जम्मा गराईएको थियो । अभियानको शुरुवातदेखि नै सहकार्य गर्दै आएको रेडक्रस शाखाले आवश्यक कागजातको जोहो गरी गुगलमा पठाउने काम गरेको नेपाल रेडक्रस सोसाईटी लमजुङ शाखाका सभापति दीपक बरालले जानकारी दिनुभयो ।

संकलित रकम रेडक्रस शाखामैं एक कार्यक्रमका विच शुक्रबार जिल्ला प्रशासन कार्यालय लम्जुङका प्रमुख जिल्ला अधिकारी कृष्णप्रसाद शर्माले विभिन्न राजनैतिक दलका प्रतिनिधिहरु, रेडक्रसका पदाधिकारीहरु र पत्रकारको रोहवरमा हस्तान्तरण गर्नुभएको थियो ।

संकलित रकम मध्ये समूहले रेडक्रस लमजुङ शाखालाई २० हजार रुपैयाँ सहयोग गरेको भने बाँकी रकम २४ लाख ९ हजार १ सय ५९ रुपैयाँ प्राईम बैंकमा जम्मा गरिएको छ । मध्यनेपालका स्थानीय समाजसेवी खगराज घिमिरे, रमेशचन्द्र घिमिरे र चित्रा थापाको नाममा संयुक्त खाता खोली सो रकम राखिएको हो । उक्त रकम पारदर्शी रुपमा पीडितहरुमाझ पारदर्शी ढंगले पु¥याईने खातावालाहरुले प्रतिवद्धता व्यक्त गर्नुभएको छ ।

कार्यक्रममा प्रमुख जिल्ला अधिकारी कृष्णप्रसाद शर्माले विदेशमा रहेर पनि आफ्नो जन्मभूमिमा रहेका दाजुभाइलाई परेको समस्यामा मलम थप्ने कार्य गरेको भन्दै जिल्लामा पहिरोबाट विस्थापित हुन परेकाहरुको उचित व्यवस्थापनका लागि आफ्नो तर्फबाट पनि सक्दो पहल गर्ने प्रतिवद्धता व्यक्त गर्नुभयो ।