News Portal

ताजा शिर्षकहरु

चर्चित शिर्षकहरु

प्रमुख समाचार विज्ञान-प्रविधी स्वास्थ्य

नेपालमा पनि देखियो कोरोनाको नयाँ भाइरस

'नयाँ भाइरस संक्रमण हुने तीनैजना बेलायतबाट नेपाल फर्किएका नागरिक हुन्'

काठमाडौं । नेपालमा पनि नयाँ संस्करणको कोरोना भाइरस देखा परेको छ । बेलायत र अफ्रिकी मुलुकहरूमा देखिएको कोरोना भइरसको नयाँ संस्करण नेपालमा पनि तीनजनामा देखा परेको हो । स्वास्थ्य मन्त्रालयले सोमबार जारी गरेको विज्ञप्तिमा बेलायतबाट फर्किएका नागरिकका ६ वटा नमुना मध्ये तीनजनामा नयाँ भाइरसको संक्रमण पुष्टि भएको उल्लेख गरेको छ ।

विज्ञप्तिअनुसार बेलायतमा देखिएको नयाँ भाइरस बी ११७ नै नेपालमा पनि देखिएको हो । बेलायतबाट फर्किएका नागरिकहरूबाट संकलन गरिएको नमुना परीक्षण गर्दा एस जिन टार्गेट नेगेटिभ देखिएपछि नयाँ प्रजातिको भाइरस पुष्टि गर्न विश्व स्वास्थ्य संगठनको सहयोगमा २७ पुसमा मन्त्रालयले नमुना हङकङ पठाएको थियो । नमुना परीक्षणपछि इमेलमार्फत राष्ट्रिय जनस्वास्थ्य कार्यालयलाई पठाएको नतिजामा तीनजनामा संक्रमण पुष्टि भएको मन्त्रालयले जनाएको छ ।

नयाँ भाइरस संक्रमण हुने तीनैजना बेलायतबाट नेपाल फर्किएका नागरिक हुन् । संक्रमित हुनेमा २८ वर्षीया महिला, ६७ र ३२ वर्षीय पुरुष छन् । हाल २८ वर्षीया महिला र ३२ वर्षीय पुरुषमा संक्रमण नेगेटिभ देखिएको छ भने ६७ वर्षीय पुरुष भने पोजेटिभ नै रहे पनि कुनै पनि लक्षण नदेखिएको स्वास्थ्य मन्त्रालयले जनाएको छ ।

कोभिड भाइरसको नयाँ भेरियन्ट नेपालमा पनि देखिएसँगै स्वास्थ्य मन्त्रालयले भाइरस फैलनबाट बच्नका सामाजिक दूरी कायम गर्ने, मास्कको प्रयोग गर्ने र सरसफाइमा ध्यान दिन आग्रह गरेको छ ।

प्रतिक्रिया