News Portal

ताजा शिर्षकहरु

चर्चित शिर्षकहरु

राजनीति समाचार

दबाब र प्रभावबाट मुक्त भएर अनुसन्धान गर्न आईजिपीको निर्देशन

काठमाडौं, १ मंसिर । प्रहरी महानिरीक्षक डा. मनोजकुमार केसीले कुनै पनि दबाब र प्रभावबाट पूर्ण रूपमा मुक्त रहेर अपराध अनुसन्धान गर्न प्रहरी कर्मचारीलाई स्पष्ट निर्देशन दिएका छन्।

नेपाल प्रहरी प्रधान कार्यालय अपराध अनुसन्धान विभागको ७१औँ स्थापना दिवसको अवसरमा मंगलबार आयोजित ‘वित्तीय अपराध अनुसन्धानः प्रमाण संकलनदेखि फैसलासम्म’ विषयक एकदिवसीय कार्यशाला गोष्ठीलाई सम्बोधन गर्दै उनले अनुसन्धानलाई निष्पक्ष, पारदर्शी, व्यावसायिक, प्रमाणमुखी र परिणाममुखी बनाउन विशेष जोड दिए।

प्रहरी महानिरीक्षक केसीले वर्तमान अवस्थामा अपराधको स्वरूप, अपराधीको कार्यशैली र अपराध सञ्जाल तीव्र गतिमा परिवर्तन भइरहेको बताए। प्रविधिको विकासले अपराध गर्ने तरिका नै बदलिएको र विशेष गरी बैंकिङ कसुर, वित्तीय ठगी, सहकारी तथा लगानीसम्बन्धी अनियमितता, अनलाइनमार्फत हुने आर्थिक अपराध, सम्पत्ति शुद्धीकरण तथा अवैध वित्तीय कारोबारको जटिल स्वरूपले अनुसन्धानमा नयाँ चुनौती थपिएको उनको भनाइ थियो।

वित्तीय अपराधको बदलिँदो स्वरूपलाई सम्बोधन गर्न परम्परागत अनुसन्धान पद्धतिलाई आधुनिक प्रणालीतर्फ रूपान्तरण गर्नुपर्ने, नवीनतम प्रविधिको प्रयोग बढाउनुपर्ने, डिजिटल फोरेन्सिक क्षमता अभिवृद्धि गर्नुपर्ने, विशेषज्ञ जनशक्ति विकास गर्नुपर्ने र आवश्यक स्रोतसाधन व्यवस्थापन गर्नुपर्नेमा उनले जोड दिए।

वित्तीय अपराध अनुसन्धान नेपाल प्रहरीको एकल प्रयासबाट मात्र सम्भव नहुने उल्लेख गर्दै प्रहरी महानिरीक्षक केसीले नेपाल राष्ट्र बैंक, वित्तीय जानकारी इकाइ, सम्पत्ति शुद्धीकरण अनुसन्धान विभाग, बैंक तथा वित्तीय संस्था, दूरसञ्चार तथा इन्टरनेट सेवा प्रदायकलगायत सबै सम्बन्धित निकायहरूबीच प्रभावकारी र परिणाममुखी समन्वय अपरिहार्य रहेको बताए। प्रत्येक निकायको कानुनी अधिकार क्षेत्र र जिम्मेवारीको सम्मान गर्दै सूचना आदानप्रदान, प्रमाणको शीघ्र उपलब्धता, प्राविधिक सहयोग तथा अनुसन्धान र अभियोजनबीचको समन्वयलाई संस्थागत बनाउनुपर्ने र सीमापार वित्तीय कारोबार तथा अपराध सञ्जालका हकमा अन्तर्राष्ट्रिय सहकार्य र पारस्पारिक कानुनी सहायतालाई थप प्रभावकारी बनाउनुपर्ने उनको जोड थियो।

कार्यक्रममा प्रहरी महानिरीक्षक डा. केसीले अपराध अनुसन्धान विभागद्वारा प्रकाशित ‘नेपाल प्रहरीले अनुसन्धान गरेका चर्चित घटनाहरूको संग्रह-३’ पुस्तकको विमोचनसमेत गरे। विमोचित पुस्तक विगतका अनुसन्धान अनुभव, चुनौती, सिकाइ र सफलतालाई संस्थागत ज्ञानको रूपमा अभिलेखीकरण गर्ने महत्वपूर्ण प्रयास भएको उल्लेख गर्दै उनले यसमा समेटिएका घटनाहरू नयाँ पुस्ताका अनुसन्धानकर्ताका लागि सिकाइको स्रोत बन्ने र अनुसन्धान पद्धतिमा सुधार गरी अनुसन्धानलाई अझ प्रभावकारी बनाउने आधार तयार गर्ने अपेक्षा व्यक्त गरे।

अपराध अनुसन्धान विभागले नेपाल प्रहरीको अपराध अनुसन्धान क्षमता विकास, जटिल तथा संवेदनशील अपराधको मार्गनिर्देशन, अनुसन्धान पद्धतिको संस्थागत सुदृढीकरण र व्यावसायिक दक्षता अभिवृद्धिमा महत्वपूर्ण भूमिका निर्वाह गर्दै आएको चर्चा गर्दै महानिरीक्षक केसीले विभागको स्थापना दिवसको अवसरमा शुभकामना व्यक्त गरे। आयोजित कार्यशाला समयसापेक्ष र अत्यन्त महत्वपूर्ण रहेको उल्लेख गर्दै उनले यसबाट वित्तीय अपराध अनुसन्धानका विद्यमान चुनौतीको वस्तुनिष्ठ विश्लेषण, प्रमाण संकलनदेखि अभियोजन र फैसलासम्मको प्रक्रियामा सुधारका उपाय तथा सम्बन्धित निकायबीचको समन्वयलाई थप प्रभावकारी बनाउने व्यावहारिक सुझाव प्राप्त हुने अपेक्षा गरे।

कार्यशालामा महान्यायाधिवक्ताको कार्यालयका सहन्यायाधिवक्ता ज्ञानप्रसाद भुसालले वित्तीय अपराध अनुसन्धानमा अभियोजन तथा फैसलाका पक्षहरू, नेपाल प्रहरी प्रधान कार्यालय अपराध अनुसन्धान विभागका प्रहरी उपरीक्षक मोहनकुमार थापाले वित्तीय अपराधको अवस्था, प्रकृति र प्रवृत्ति, साइबर ब्युरोका प्रहरी उपरीक्षक दीपकराज अवस्थीले डिजिटल प्रमाण संकलन र केन्द्रीय अनुसन्धान ब्युरोका प्रहरी नायब उपरीक्षक दानबहादुर थापाले सम्पत्तिको खोजी र चुनौतीहरूसम्बन्धी प्रस्तुतीकरण गरेका थिए। प्रस्तुतीकरणपछि सहभागीहरूबीच बृहत् छलफलसमेत भएको थियो।

डनन्यूज ट्रेन्डिङ