पोखरा, २८ साउन । पोखरा महानगरपालिका र दक्षिण कोरियाको युङजिन विश्वविद्यालयबीच प्राविधिक शिक्षाका लागि छात्रवृत्ति र सहकार्यसम्बन्धी सम्झौता भएको छ। पोखरा महानगरका मेयर धनराज आचार्य र विश्वविद्यालयका प्रोफेसर चोइ जेइयोङले सम्झौतामा हस्ताक्षर गर्नुभएको छ।

यो सम्झौताले पोखराका विद्यार्थीलाई प्राविधिक शिक्षा, पर्यटन र प्रविधिका क्षेत्रमा अन्तर्राष्ट्रिय अवसर प्रदान गर्नेछ। यसले शिक्षा, संस्कृति र प्राविधिक सहयोगमार्फत दुई देशबीचको सम्बन्ध बलियो बनाउनेछ। सम्झौता अनुसार, विद्यार्थी र अध्येताहरूका लागि शैक्षिक कार्यक्रम, भ्रमण, भर्चुअल कक्षा, संयुक्त अनुसन्धान र नवीन परियोजनाहरूमा सहकार्य हुनेछ।

मेयर आचार्यले यो सम्झौताले कोरियामा अध्ययन गर्न जाने विद्यार्थीलाई पढाइ, सामाजिक सुरक्षा र रोजगारीमा सहयोग पुग्ने बताउनुभयो। पोखरा महानगरले यसका लागि आवश्यक सहजीकरण गर्ने उहाँको भनाइ छ।

युङजिन विश्वविद्यालयका प्रोफेसर चोइले पोखराको शैक्षिक विकासका लागि सहकार्य गर्न तयार रहेको बताउनुभयो। विशेषगरी प्राविधिक शिक्षा र मानव संसाधन विकासमा पोखरासँग मिलेर काम गर्न इच्छुक रहेको उहाँले उल्लेख गर्नुभयो। यसअघि पनि कोरियाली सरकार र संस्थाहरूको सहयोगमा पोखरामा विभिन्न परियोजना सञ्चालन भएका छन्।