काठमाडौं, १३ जेठ । कविता, निबन्ध र नियात्रा लेखनमा स्थापित साहित्यकार सुमन थापा ‘सङ्गम’को कविता कृति ‘अभ्युदय’ सार्बजनिक भएको छ। यसमा ५२ ओटा स्वादिला कविता सङ्ग्रहित छन्।

साहित्यरुपी चेतनाको मसाल बोकेर हिँडेकी प्रभावशाली स्रष्टा हुन्, सुमन। यिनका कविताले विकृति, विसङ्गती र विभेद विरुद्ध औंला ठड्याउँदै समतामूलक एवम् न्यायपूर्ण समाजका पक्षमा शंखघोष गर्दछन्।

जीवनको शास्वत सत्य ‘प्रेम’बाट कोही टाढिन सक्दैन। त्यसैले प्रेम, विरह र विछोड पनि यिनका विषयवस्तु हुन्। यिनले कविताकर्मसँगै आमसञ्चारका माध्यममा विचारप्रधान लेख, नियात्रा र समालोचना पनि लेख्दै आएकी छिन्। यसरी आफूलाई कुशल लेखकका रुपमा चिनाउन सफल भइसकिन्।

नेपालगञ्जको माटोमा जन्मेहुर्केर साढे दुई दशकदेखि साहित्य साधनामा समर्पित सङ्गमको पहिलो कृति हो, ‘माइतीघरको फूल’। त्यस्तै ११ जना कविको संयुक्त सङ्ग्रह ‘प्रेमको आदिम गीत’ दोस्रो कृति।

साहित्यको फूलबारीमा मुस्कुराईरहेकी सङ्गमको नयाँ कृति ‘अभ्युदय’ हालै काठमाडौंमा लोकार्पण गरियो। पुतलिसडकस्थित ग्रिनलिफ भेन्यूमा आयोजित समारोहमा उनको परिवारका चार पुस्ताले लोकार्पण गरेका हुन्। उनका ८४ वर्षीय पिता विष्णुवीर, छोरीहरु समीक्षा, प्रशंसा र कृशला, नातिनीहरु आरुन्या र आभ्याना तथा नाति आयांश केसीले एकसाथ कृति विमोचन गरे।

बिना तामझाम गरिएको कार्यक्रमको सुरुमा कवि सुमनले कृतिबारे जानकारी दिएकी दिइन्। त्यसपछि उनकी छोरी समीक्षाले पाहुनाको स्वागत गरिन्।

कार्यक्रममा कविहरू रमी प्रिया, विश्व सिग्देल, श्रीबाबु कार्की र प्रोल्लास सिन्धुलीयले अभ्युदयमा समावेश कविता वचन गरेका थिए। त्यस्तै साहित्यकार तथा समालोचक डा. शेखरकुमार श्रेष्ठले कृतिबारे टिप्पणी प्रस्तुत गरेका थिए।

उनका संस्मरणात्मक आलेखकहरू पनि पठनीय छन्। त्यसैले संस्मरणात्मक लेखहरूको सङ्गालो प्रकाशनको तयारीमा लाग्नु पर्ने देखिन्छ।