लेखनाथ, २५ फागुन । त्रिवेणी इन्टरनेशनल कलेज पोखरा २७ मा शुक्रबार देखि स्पोर्टस् मिट २०८१ शुरु भएको छ । कलेजका विद्यार्थीले विभिन्न १४ खेलका लागि प्रतिस्पर्धा गर्नेछन् ।

स्पोर्टस मिटको शुभारम्भ गर्दै कलेजका पूर्वअध्यक्ष एवं नेपाल उद्योग बाणिज्य महासंघका पूर्वकेन्द्रिय सदस्य बाबुराम गिरीले विद्यार्थीको शैक्षिक गुणस्तर सहित अन्य क्षेत्रमा भएको प्रतिभा मापनका लागि खेल आवश्यक रहेको बताए ।

अध्ययनले ज्ञान र बौद्धिक क्षमता बृद्धि भए जस्तै खेलले विद्यार्थीहरुका बिचमा रहेको फरक विधा र क्षमताको पहिचान हुने उल्लेख गरे ।

कार्यक्रममा कलेज व्यवस्थापन समितिका अध्यक्ष सुमन भट्टराईले त्रिवेणीमा अध्ययन गरेका विद्यार्थी रोजगारको जुनसुकै क्षेत्रमा पनि अब्बल बन्ने गरी तयारी गर्न आग्रह गरे ।

अध्यक्ष भट्टराईले योगले स्मरणशक्तिमा बृद्धि गराउन सहयोग पुर्याए जस्तै खेलले शारीरिक स्वस्थता र स्फुर्ती प्रदान गर्ने उल्लेख गरे ।

सहायक क्याम्पस प्रमुख डिल्लीराम पौडेलले बार्षिक तालिका अनुसार आयोजना गरिएको स्पोर्टस् मिटमा कलेजका ५ सय विद्यार्थीहरुले सहभागिता जनाउने छन् ।

कार्यक्रममा सञ्चारकर्मी नबराज सापकोटा, प्राध्यापक जीवन भण्डारी र विद्यार्थी कल्याणकारी समितिका अध्यक्ष सुदिन मोहन भट्टराई लगायतले स्पोर्टस् मिटका बारेमा आ–आफ्नो भनाई राखेका थिए ।

स्पोर्टस् मिटमा महिला तथा पुरुष एकसय मिटर दौड, भलिबल, सटफुट, बलथ्रु सहितका १४ खेलमा प्रतिस्पर्धा गराईने सहायक क्याम्पस प्रमुख पौडेलले बताए ।

व्यवस्थापन संकाय तर्फ स्नातक र स्नाकोत्तर तहका ६ सय भन्दा बढी विद्यार्थीले सहभागिता जनाउने स्पोर्टस् मिट फागुन २८ गतेसम्म सञ्चालन हुनेछ ।