पोखरा । पोखरा ६ बैदाममा रहेकोे जलारी दिदीबहिनी समुहको आयोजना तथा स्वतन्त्र पत्रकार संघ नेपाल कास्की शाखाको सहयोगमा तीन दिने उद्घोषण, नेतृत्व विकास तथा माइन्यूट लेखन तालिम शनिबारदेखि सुरु भएको छ ।

कार्यक्रमका प्रमुख अतिथि पोखरा महानगरपालिका वडा नं. ६ का वडा अध्यक्ष बिष्णुबहादुर भट्टराईले उद्घाटन गर्दै वडा कार्यालयबाट उपलब्ध सेवा सुविधालाई पहिलो प्राथमिकतामा राखेर काम गरिरहेको बताए । उनले वडा भित्रका लक्षित बर्गलाई प्राथमिकता दिई विभिन्न तालिम दिनुका साथै आय आर्जनमा जोड्ने किसिमका तालिम दिइने बताए ।

पोखरा ६ की वडा सदस्य शोभा जलारीले पहिलोपटक जलारी दिदीबहिनीहरुलाई तालिम लिएको धेरै कुरा सिकाउने बताउँदैं यस्ता कार्यक्रम नियमित गर्नुपर्ने बताईन् ।

स्वतन्त्र पत्रकार संघ कास्कीका अध्यक्ष कृष्णबहादुर रानाभाटले तालिममा सिकेको कुरा ब्यवहारमा उतार्न सधैं तत्पर हुन अनुरोध गर्दै तालिम नियमित लिइ रहनुपर्ने बताए ।

कार्यक्रममा हर्पन फेवा मत्स्य सहकारी संस्थाका अध्यक्ष ज्ञानबहादुर जलारी र फेवा बाराही आमा समूहकी अध्यक्ष सीता जलारी लगायतले बोलेका थिए ।

तीन दिनसम्म संचालन हुने उक्त तालिममा स्वतन्त्र पत्रकार संघ कास्कीमा आवद्ध पत्रकारहरु सागर कार्की, कृष्ण रानाभाट, डिल्लीराम काफ्ले, रजनी तामाङ, राधा ढकाल, मदनराज जैसी र अर्चना श्रेष्ठले उद्घोषण कला, नेतृत्व बिकास र माइन्यूट लेखन सम्बन्धि तालिम दिनेछन् ।

समूहकी अध्यक्ष मीना जलारीको अध्यक्षतामा भएको कार्यक्रममा स्वागत मन्तव्य सहसचिव सम्झना खत्रीले र संचालन सचिव दीपा जलारीले गरेका थिए ।